Jónína Ingibjörg Samúelsdóttir

Prjónar og þess háttar

2009-04-30T11:39:00.003Z

Sæl

Langt síðan síðast.

Keypti mér prjóna og lopa í gær. Ákvað að rannsaka hvort ég kynni enn að prjóna. Ég kann enn að prjóna. Fitjaði upp á sokkum eða vettlingum (verður ákveðið síðar) og prjónaði nokkrar umferðir. Það var bara gaman. Veit ekki enn hvaða stærð er um að ræða. Sýnist samt að þetta muni verða plagg fyrir ungling eða smávaxinn einstakling. Skiptir engu máli því tilgangurinn er að prjóna.

Vitanlega hefur ýmislegt á daga mína drifið síðan síðast. Fermingarveislur, páskar, tónleikar og stelpugleði.

Sóley bauð mér á tónleika með Eyvöru á Nasa og það var vægast stórkostlegt. Hún er án efa ein af þeim bestu.

Lifið heil

Vinveitt yfirtaka

2009-02-09T19:28:00.004Z

Sæl

Alveg er það ótrúlegt að þegar mest er að gerast í samfélaginu þá er andinn víðs fjarri.

Mér hefur dottið ótrúlega margt í hug sem færa mætti til bókar en ég gleymi því alltaf jafnharðan. Svona er maður nú orðinn gamall og kalkaður. Ég þyki ekki gömul í dag þegar meðalævi íslenskra kvenna er um 80 ár. Um miðja 19. öld var meðalævi kvenna 38 ár og því væri ég að líkindum dauð eða í besta falli orðin öldruð ef nú væri árið 1850.

Nú eru allir hættir að blogga, eða sko, kannski ekki ALLIR en vissulega MARGIR. Ég hef hugsað mikið um orsökina og allt í einu rann upp fyrir mér ljós:

Snjáldurskinnan hefur tekið völdin!

Datt mér fyrst í hug að um óvinveitta yfirtöku hefði verið að ræða þar sem ýmsir eru eflaust ósáttir við hana. Það verður þó að segjast að yfirtaka samfélags sem byggir á vinasamböndum getur varla talist annað en vinveitt.

Ég veit ekki hvað mér á að finnast um Flettismettið. Að sumu leyti finnst mér þetta mjög sniðugt apparatus en að öðru leyti afar heimskulegt. Sjálfsagt er þetta afar sniðugt kerfi sem stundum er notað á heimskulegan hátt. Það er með þetta eins og svo margt annað að hópsálin nær yfirhöndinni. Allir skulu dregnir í dilka og innstu hjartans mál og tilfinningar opinberaðar. Að auki skal ræða við vinina fyrir allra augum. Mín kaldlynda kynslóð á dulítið erfitt með það. Alveg á sama hátt og hún á erfitt með að setja fram sín hjartans mál á veraldarvefinn í því formi sem gert er hér og nú. Þar með er komin skýring, að hluta til, á ástæðum þess hve lítið er hér skrifað.

Lifið heil

Bannað að hafa jólin á blogginu

2009-01-16T13:21:00.002Z

Skv. Steinu pæju er ekki við hæfi lengur að hafa jólin á blogginu. Eina leiðin út úr þessu er að skapa nýja færslu. Ég er hins vegar svo andlaus (rauðvínslaus kannski) að þetta er ekki auðleyst.

Er búin að lesa Hallgrím, Arnald og Jón Hall. Allt saman fínustu bækur. Arnaldur og Jón Hallur skrifa ágætis krimma og Hallgrímur er fyndinn og háðskur.

Hallgrímur fékk víst miður góða dóma að þessu sinni. Ég er ekki með á hreinu hvað fólst í þessum slæmu dómum (nenni ekki að kynna mér það) en ég skemmti mér hið besta yfir lestri bókarinnar.

Þá var komið að því að dusta rykið af kilju sem ég fékk í bókaklúbbi í haust en hafði ekki gefið mér tíma til að lesa. Mikið assgoti var ég fegin að hafa ekki lesið hana á undan hinum ofantöldu. Þær eru nefnilega þannig að maður klárar eina og byrjar á næstu. Ekkert mál. Þessi, hins vegar, er þannig að maður klárar hana og veit að maður getur ekki lesið aðra bók í bráð.

Þetta er bókin Himnaríki og helvíti eftir Jón Kalman Stefánsson. Ég er orðlaus yfir ágæti þessarar bókar. Eina sem ég get sagt er: Skyldulesning!
Nú get ég bara varla beðið eftir að lesa meira eftir Jón Kalman (já ég veit ég sagðist ekki getað lesið aðra bók í bráð, en það var hvít lygi) og stefni að því að fá mér Sumarljós og svo kemur nóttin, fyrir inneignarnótuna mína hjá Eymundsson.

Talandi um Sumarljós, þá bauð mamma mér í Þjóðleikhúsið að sjá það verk. Við höfðum báðar gaman að. Áður en við fórum var ég hálffúl yfir að hafa ekki verið búin að lesa bókina áður, en nú er ég fegin. Ég er ekki viss um að mér hefði líkað eins vel í leikhúsinu ef ég hefði haft samanburð við bókina. En það kemur í ljós síðar.

Þangað til:
Lifið heil

Síðasti dagur jóla

2009-01-06T10:29:00.002Z

Þrettándinn er kominn. Alltof fljótt. Ég vil hafa jólin áfram aðeins lengur. Hvað ætli ég komist upp með að láta jólatréð standa lengi?

Jólahappdrætti

2008-12-23T11:16:00.006Z

Jæja nú er komin Þorláksmessa og nú má fara að skreyta.

Fór í Kringluna í gær. Hugsaði með mér að best væri að fara þangað þar sem það spáði stormi og rigningu. En þar var vont að vera. Margt fólk, hávaði, ég sá ekki neitt og varð bara alveg rugluð. Svo var líka alltof heitt. Rauk út og beint niður á Laugaveg. Þar er alltaf best að vera, ganga í rokinu og rigningunni og kíkja inn í búðirnar. Hressandi! Yndislegt!

Sökum þess hversu rugluð ég er hef ég ákveðið að hafa jólahappdrætti.
Það felst í því að þeir sem fá jólakort þetta árið eru vinningshafar!
Munið samt að jólin standa í þrettán daga og því ekkert útilokað að menn hljóti vinning áður en jólin eru liðin.

Gleðileg jól mínir góðu vinir, vandamenn og aðrir sem kunna að kíkja á þetta.
Hafið það sem allra best um jólin og munið eftir þeim sem minna mega sín.

Allt að gerast

2008-12-05T16:15:00.002Z

eða í það minnsta eitthvað.

Er flutt að Löngulínu 9 í Garðabæ.
Hef sett Lenín út í glugga en á eftir að hengja rauða fánann á svalirnar.

Það er engin smá vinna að koma sér fyrir í nýju húsnæði. Liðin vika hefur öll farið í það og aðeins farið að sjá fyrir endann á því núna. Vonast til að geta ryksugað og þurrkað af í fyrramálið og slappað af eftir það.

Núna þarf ég að drífa mig af stað á tónleika með kórnum hennar mömmu. Hún er greinilega alltaf að hressast meira og meira og spennandi að vita hvað hún tekur sér fyrir hendur næst!

Eigið góða aðventu og munið eftir því mikilvæga!

Nýjasta tækni og vísindi

2008-11-18T13:33:00.002Z

Ég hafði skrifað langan og kjarnyrtan texta í póstforrit tölvunnar. Var alveg í ham og pikkaði sem óð væri. Hlutirnir gerðust hratt. Svo hratt að ég geri mér engan veginn grein fyrir hvað gerðist í raun. Trúlega hef ég þrýst á rangan takka en það eina sem ég veit er að það drapst á tölvunni. Þegar ég kveikti á henni aftur var allt farið sem ég hafði skrifað!

Ef þú færð lán frá öðrum færðu lán hjá okkur

2008-11-12T10:35:00.002Z

Hinn alþjóðlegi
Nýjustu fregnir af Alþjóða gjaldeyrissjóðnum herma að við fáum ekki lán frá þeim nema við fáum lán frá öðrum. Hvers lags rugl er það nú? Ég hef ekki hundsvit á þessu en hélt að Alþjóða gjaldeyrissjóðurinn væri einmitt til þess að hjálpa þjóðum í neyð. Þurfum við lán frá þessum auðvaldsherrum ef við getum fengið lán frá vinum okkar og frændum?
Ég held við ættum að leggja allt kapp á að fá aðstoð frá nágranna-, vina- og frændþjóðum og gefa skít í Alþjóða gjaldeyrissjóðinn.

Gunni formaður hinn góði
Gunni formaður VR er ekki á þeim buxunum að iðrast gerða sinna frekar en flestir þeirra sem hafa líf okkar í hendi sér.
Var að lesa afsökunargrein hans í Fréttablaðinu þar sem hann segist hafa haft hagsmuni VR félaga að leiðarljósi þegar hann samþykkti hinar siðlausu ívilnanir til handa stjórnendum Kaupþings.
Því er haldið fram að það hafi aðeins verið tveir kostir í stöðunni, að falla frá persónulegri ábyrgð skuldara eða eiga það á hættu að stjórnendur seldu bréfin sín með alvarlegum afleiðingum.
Af hverju var allt í einu hætta á því þann 25. september að starfsmenn bankans færu unnvörpum að selja öll bréfin sín í bankanum? Af því að þeir væru allt í einu orðnir blankir? Allir í einu?
Nei það var einfaldlega vegna þess að stjórnendur vissu að staða Kaupþings væri slæm og treystu ekki lengur fjárfestingum sínum í bankanum.
Af hverju samþykkti Gunni góði þessa ívilnun?
Af hverju lagði hann ekki til við lífeyrissjóðinn að bréf hans í bankanum yrðu öll seld hvelli og peningunum fyrir komið á verðtryggðum reikningi í einhverjum Sparisjóði?

Markaðurinn
Talsmenn markaðshyggjunnar rökstyðja markaðskerfið með því að markaðurinn sé sjálfbær. Þ.e. að hann lagi sig að aðstæðum án utanaðkomandi inngripa. Gott og vel. Markaður með fyrirtæki þrífst því á upplýsingum. Virði fyrirtækja ræðst því af því verði sem kaupendur og seljendur verða ásáttir um.
Hvernig vita fjárfestar hvaða verð er raunhæft? Jú, þeir byggja það á upplýsingum og vísbendingum. Þeir skoða m.a. ársreikninga, hlutfall framboðs og eftirspurnar og síðast en ekki síst hverjir það eru sem vilja kaupa eða selja. Ef stjórnendur vilja kaupa bréf í fyrirtæki sínu er það vísbending um að þeir hafi trú á fyrirtækinu. Ef stjórnendur vilja selja í fyrirtæki sínu er það vísbending um hið gagnstæða.
Það er alveg rétt sem stjórnarmenn Kaupþings halda fram að ef stjórnendur og aðrir starfsmenn Kaupþings hefðu rokið til og sett bréfin sín á sölu þá hefði það haft alvarlegar afleiðingar. Það hefði nefnilega verið vísbending til annarra fjárfesta um að bankinn væri ekki lengur traustsins verður.
En það er einmitt það sem markaðurinn snýst um, ekki satt?

Það er alveg ótrúlegt að talsmenn markaðshyggjunnar skuli vera fremstir í flokki með að grípa til handvirkra aðgerða sem þeir eru svo mjög á móti og fella gjarnan undir argasta kommúnisma.
Eða er þetta ekki markaðshyggja?
Er þetta kannski bara eiginhagsmunahyggja?
Látum markaðinn ráða meðan hann er okkur í hag!

Af hverju lagði Gunni góði ekki til að bréf Lífeyrissjóðs verslunarmanna yrðu seld og fjármunum sjóðsins komið fyrir á öruggum stað?

Klukkuð af hinum ólíklegasta

2008-11-02T18:34:00.002Z

Haldið þið ekki bara að elsku litli Drengurinn hafi ekki bara klukkað mömmu sína. Ég þori vitanlega ekki öðru en að bregðast við hið snarasta:

1. Fjögur störf sem ég hef unnið um ævina:

Sjálfstætt starfandi barnapía og sendill
SÍF, þar sem lífið var saltfiskur
Kaupfélag Langnesinga, þar sem lífið var... ja þú veist... kuffélagið
Veitingahúsið Perlan, dyravörður (einkennisbúningur og allt!)

2. Fjórar íslenskar bíómyndir sem ég held upp á:

Sódóma Reykjavík
Rotterdam Reykjavík
Astrópía
Englar alheimsins

3. Fjórir staðir sem ég hef búið á:

Vestmannaeyjar
Þórshöfn
Shanghai
Reykjavík

(aukaspurning) 3.a Einn staður sem ég myndi aldrei búa á:

Akureyri

4. Fjórir staðir sem ég hef heimsótt í fríum:

Dýrafjörðurinn fagri
París
Þýskaland
Þórshafnir tvær

5. Fjórir sjónvarpsþættir sem mér líkar:

Desperate housewifes
Breskir sakamálaþættir
Jeeves og Wooster
Black books

6. Fjórar síður sem ég skoða daglega:

drengur.wordpress.com
Baggalutur.is
mbl.is
icanhascheezburger.com

7. Fernt sem ég held upp á matarkyns:

Matur sannra fagmanna
rauðvín
súkkulaði
Mjólk

8. Fjórar bækur sem ég hef oft lesið:

Bílar, flugvélar og öll heimsins furðulegustu farartæki
Nancy og skíðastökkið
Láki
Salka Valka

9. Fjórir staðir sem ég myndi helst vilja vera á núna:

Í Shanghai
Í Tælandi
Á Kúbu
Í París

10. Fjórir bloggarar sem ég klukka (þ.e. þurfa að gefa upp samsvarandi gagnslausar upplýsingar):

Anna óþokki
Sóley Sigmarsdóttir frá Sólheimum í Sæmundarhlíð í Skagafirði
Stína frænka
Þóra frænka

Dýrt kveðið

2008-10-25T10:40:00.002Z

Fékk eftirfarandi vísu senda með tölvupósti og nú langar mig að vita hver samdi:

Á lítilli eyju við heimsskautahjara
býr heimakær, vansvefta, auðtrúa þjóð.
Hún leit upp til ráðsmanna loðinna svara
sem loforðum öfugt í kok hennar tróð.

Þeir níddust á trausti og trúgirni okkar
– táldrógu sannlega helvítis til.
Og allt sem þeir gerðu, þeir gordrullusokkar
gerðu þeir flottræflum sínum í vil.

En frelsið er háðara boðum og bönnum
en bláeygðir frjálshugar ímynda sér.
Þjóð mín var notuð af nýríkum mönnum
og nauðgað af útrásarvíkingaher.

Á morgun

2008-10-09T22:35:00.005Z

Ekki þarf að tíunda ástandið fyrir fólki. Á hverjum morgni bíða manns nýjar fréttir, síst skárri en fréttirnar sem bárust daginn áður. Kvíðahnúturinn í maganum magnast og maður hugsar með sér að nú geti þetta bara ekki versnað.

Nú eru Bretar komnir í fýlu og ekki útilokað að vakna bara í fyrramálið við breska þjóðsönginn og Shepherds pie.

Hvers vegna ættu þessir herskáu, gömlu nýlenduherrar ekki að vilja hefna harma þorskastríðanna, ná aftur fiskimiðunum, ódýru orkunni og mannauði okkar Frónbúa?

Það er í það minnsta ljóst að annað hvort eru okkar menn að ljúga um samskiptin eða Bretar að stunda þá herkænsku sem þeir hafa jú æft um aldir.

Lifið heil
Live whole

Merkilegur dagur

2008-09-27T12:30:00.002Z

Í dag er merkilegur dagur. Merkilegasta dagsetningin í mínu lífi, hingað til og sjálfsagt hér eftir.

Þennan dag fyrir alltof mörgum árum fæddist einkasonurinn.

Jæja

2008-09-07T10:59:00.008Z

Langt síðan síðast.
Veit ekki hvað veldur.
Leti trúlega.
Ýmislegt hefur á daga mína drifið.
Flutti að heiman.
Bý nú að Byggðavegi í afskaplega notalegri íbúð í tvíbýlishúsi:

Skömmin og dropinn

2008-07-10T12:19:00.003Z

Nei!
Ég er ekki búin með ritgerðina.
Var að velta því fyrir mér af hverju ég er svona löt að blogga um líf mitt. Ég sem ætlaði að láta þetta blogg vera, meðal annars, hálfgildings dagbók um líf mitt.
Niðurstaðan er skömmin.
Ég skammast mín fyrir að standa mig ekki nógu vel. Ég skammast mín fyrir að hafa ekki drullast til að drífa þessa ritgerð af þegar ég átti að gera það og hafði tækifæri til þess.
Nú er ég hætt að skammast mín. (eða reyna það í það minnsta)
Hverjum kemur þetta eiginlega við?
Mér og engum öðrum.

Ég hef sem sagt setið við skriftir hér í borg óttans undanfarnar vikur og árangurinn verið misjafn. Stundum hefur gengið vel og stundum illa. Þannig gengur þetta fyrir sig.
Ef ég á einhvern tímann að klára þetta verð ég að vera æðrulaus. Ekki sífellt að vera að brjóta mig niður og stressa mig upp með neikvæðum hugsunum um sjálfa mig og þessa ritgerð.
Dropinn holar steininn, sagði Gunna systir við mig einn daginn.

Ég hef komist að því, ekki í fyrsta sinn, að ég er einstaklega heppin með vini og vandamenn. Ég hef fengið að vera hér í friði og ró í yfirgefnum íbúðum ferðaþyrstra vandamanna.
Þakka ykkur fyrir það; Bogga frænka, Biggi, Ósk, Lóa og systkini mín sem alltaf eru tilbúin að taka á móti mér.
Það er ómetanlegt.

Enda þetta krúttkast með viðeigandi kveðju,
knús og kossar!

Minnisleysi

2008-07-04T23:34:00.002Z

Ég er svo kölkuð að ég gleymdi um hvað ég ætlaði að blogga rétt á meðan ég opnaði bloggdæmið!
Þetta var án efa afar merkilegt blogg.
Ég man það var stutt og laggott en afar merkilegt!
Það getur verið að ég bæti úr ef rætist úr minninu en það er þó engan veginn víst.
Enda engin sem les þetta hvort sem er.
Ég hef að vísu ekki hugmynd um hverjir lesa og hverjir ekki lesa því ég veit ekki til þess að ég sé með einhvern teljara. Gæti þó verið með fínan teljara án þess að hafa hugmynd um það. Enda er mér nokk sama.
Ég meina, ekki er fólk að senda rithöfundum bréf í hvert sinn er það les bók eftir þá?

Bensínverðið

2008-06-27T14:02:00.002Z

Horfði á Ísland í dag í gær.

Þar sagði Þorfinnur frá Evrópuferð sinni og athugun á bensínverði þar ytra. Það kom í ljós að bensínverðið hér var síst dýrara en í Evrópu. Nema í Luxembúrg þar var það víst örlítið ódýrara en hér á landi.

Ég beið eftir að Þorfinnur gerði einhvern fyrirvara um gengi krónunnar en allt kom fyrir ekki.
Hvað er að marka evrópskt bensínverð í íslenskum krónum?

Ég hefði heldur viljað samanburð á því hversu mikið bensínverðið hefur hækkað þar ytra miðað við hér eða í það minnsta einhverjar vangaveltur um gengi krónunnar í þessu sambandi.

Ein evra er jú langt í frá að vera það sama og hún var fyrir einu ári. Sem dæmi tók Þorfinnur verð á bensíni í Frakklandi: 1,60 evru lítrinn. Á gengi dagsins í dag gerir það 205 íslenskar krónur. Á gengi 27. júní 2007 gerir þetta 135 íslenskar krónur.

Skilningsvana

2008-06-19T17:49:00.002Z

Það er margt sem ég skil ekki.

Ég skil ekki alveg ástandið á bönkunum.
Ég skil ekki af hverju ríkisstjórnin þarf að koma til bjargar núna.
Eftir þetta mikla góðæri þar sem allir voru látnir halda að bankarnir hreinlega byggju til beinharða peninga skil ég ekki af hverju þeir eiga ekki neitt í handraðanum til að mæta mótlætinu. Eða hvað? Jú ég held ég skilji það reyndar alveg. Fjöldi fólks var leystur út með gríðarlegum peningagjöfum eftir að hafa, að því er virtist, staðið eitt og sér að velgengni þessara stofnana.

Svo er það þetta með eðlilega verðmyndun á fasteignamarkaði. Hefur verðmyndun á fasteignamarkaði verið eðlileg undanfarin ár? Er mikilvægt að viðhalda þessari eðlilegu verðmyndun? Hverjir hafa hagnast á þessari eðlilegu verðmyndun? Hverjir tapa á henni?
Ég hefði haldið að hóflegt húsnæðisverð væri það besta. Annars þarf auðvitað að horfa á þetta allt í samhengi. Samhengi milli launa og kostnaðar við heimili. Ef verðmyndun á húsnæðismarkaði hefur verið eðlileg undanfarin ár þá hefur verðmyndun á vinnumarkaði verið vægast sagt óeðlileg!

Svartfugl og önnur glæpasaga til

2008-06-04T22:20:00.005Z

Nú er það Svartfugl eftir Gunnar Gunnarsson sem svæfir mig á kvöldin. Höfundur les með svo róandi röddu að mér dugar sjálfsagt hver lestur í nokkur kvöld. Samt langar mig að fylgjast með sögunni en það er bara svo rosalega gott að sofna undir góðum lestri.

Ég gæti trúlega ekki hlustað á þennan merkilega lestur ef ekki væri fyrir tölvuna og veraldarvefinn því ég get vitanlega ekki með nokkru móti munað eftir því að kveikja á útvarpinu á réttum tíma.

Gulli heilbrigðis var í tíufréttunum áðan að státa sig af afrekum sínum í heilbrigðismálunum. Það er auðvitað ekkert mál að redda öllu með því að skera bara niður hjá þeim sem ólíklegir eru til að berjast fyrir rétti sínum.

Í lögum um málefni aldraðra segir m.a. orðrétt í 14. gr.:

Stofnanir fyrir aldraða samkvæmt lögum þessum eru:
1. Dvalarheimili, sambýli og íbúðir, sérhannað fyrir þarfir aldraðra sem ekki eru færir um að annast heimilishald þrátt fyrir heimaþjónustu. Á stofnunum þessum skal vera varsla allan sólarhringinn, öryggiskerfi í hverri íbúð og völ á fjölbreyttri þjónustu [...]

Á dvalarheimilinu á Djúpavogi má gamla fólkið hringja í tiltekið símanúmer ef það þarf á aðstoð að halda á nóttunni. Er síminn við hendina þegar eitthvað kemur fyrir? Er símanúmerið við hendina? Hvað stendur í 14. gr. laga um málefni aldraðra?

Frétti í dag að eins væri ástatt á elliheimili á Grenivík. Þar er að vísu neyðarhnappur eftir því sem mér skilst. Hvar er neyðarhnappurinn? Er hann á gólfinu þar sem manneskja liggur ef til vill eftir fall eða áfall? Er þessi manneskja með rænu til að nota neyðarhnapp?

Hvað er til ráða?

Til hamingju sjómenn

2008-06-01T09:16:00.003Z

Í dag er sjómannadagurinn. Hann er svipur hjá sjón. Það þarf að hefja hann til vegs og virðingar á ný. Eða eigum við kannski að stofna bankamannadaginn?

Hvað á þetta að þýða?

2008-05-07T19:43:00.003Z

Ég er brjáluð!

Hvernig dettur nokkrum manni það í hug á tuttugustu og fyrstu öldinni að framkvæma hreppaflutninga á gömlu fólki?

Fólki sem er orðið það gamalt og þreytt að það þarf að flytja heimili sitt undir verndarvæng samfélagsins.

Fólki sem hefur átt þátt í því að koma okkur Íslendingum þangað sem við erum í dag.

Honum Herði Högnasyni hjúkrunarforstjóra á Ísafirði dettur það í hug.

Hvaða upplit haldið þið að yrði á Herði Högnasyni hjúkrunarforstjóra ef Gulli ráðherra hjólaði sér vestur til hans, bankaði upp á og segði honum að hann yrði að flytja á Djúpuvík í fjórar vikur í sparnaðarskyni?

Held ég sendi honum Herði Högnasyni hjúkrunarforstjóra mannréttindaákvæði stjórnarskrárinnar, mannréttindayfirlýsingu Sameinuðu þjóðanna og Mannréttindasáttmála Evrópu.

Hvar er guð?

2008-05-06T22:23:00.002Z

Tímanna tákn

2008-04-07T20:57:00.003Z

Sakamál

2008-04-02T22:17:00.003Z

Hvernig stendur á því að ríkissjónvarpið sendir út breska sakamálaþætti eftir tíufréttir?
Ég hélt það væru bara miðaldra kerlingar sem horfðu á þess háttar þætti. Þær þurfa að fá lúrinn sinn og geta ekki vakað fram undir miðnætti.

Talandi um miðaldra kerlingar þá var ég að staga í fötin mín í kvöld. Það væri nú ekki í frásögur færandi nema fyrir það að ég get með engu móti þrætt nál, svo sjóndöpur er ég orðin. Það var með herkjum að mér tækist það með hjálp sérstaks þræðingarapparats. Öðru vísi mér áður brá!

Það hlýtur að vera erfitt að vera auglýsingamaður og þurfa að koma með nýjar og ferskar hugmyndir látlaust. Mér datt þetta í hug þegar ég opnaði vefgáttina og við mér blasti vísir.is. Sú síða er nú upphafssíða hjá mér þar sem ég lét gabbast þegar mér var lofað dýrindis vinningum að launum. Ekki man ég lengur hvenær átti að draga um vinningshafa né hvar þeir ætluðu að birta nöfnin en engin merki sé ég um það núna að þessi leikur hafi nokkurn tímann átt sér stað.

Góðar stundir

Ódýrt blogg

2008-03-26T18:45:00.002Z

Hrútur: Þú hittir nýtt fólk. Ef þér fellur ekki strax vel við einhvern, snúðu þér þá að næstu manneskju. Þú þarft ekki fimm nýja kunningja. Þú þarfnast gullins vinar.

Mig vantar hvorki vini né kunningja. Ég á nú þegar gullna vini. Svo á ég líka gullna fjölskyldu.

Hvað getur maður beðið um meira?

Aldin móðir eðalborna

2008-03-15T14:09:00.001Z

Þjóðfundarsöngurinn 1851

Aldin móðir eðalborna,
Ísland, konan heiðarlig,
ég í prýðifang þitt forna
fallast læt og kyssi þig,
skrípislæti skapanorna
skulu ei frá þér villa mig.

Þér á brjósti barn þitt liggur,
blóðfjaðrirnar sogið fær;
ég vil svarinn son þinn dyggur
samur vera í dag og gær;
en hver þér amar alls ótryggur,
eitraður visni niður í tær.

Ef synir móður svíkja þjáða,
sverð víkinga mýkra er;
foreyðslunnar bölvan bráða
bylti þeim, sem mýgjar þér;
himininn krefjum heillaráða
og hræðumst ei, þó kosti fjer.

Legg við, faðir, líknareyra,
leið oss einhvern hjálparstig;
en viljirðu ekki orð mín heyra,
eilíf náðin guðdómlig,
mitt skal hróp af heitum dreyra
himininn rjúfa kringum þig.

Móðir vor með fald og feldi
fannhvítum á kroppi sér,
hnigin að ævi kalda kveldi,
karlæg nær og holdlaus er;
grípi hver sitt gjald í eldi,
sem gengur frá að bjarga þér.

Sjáðu, faðir, konu klökkva,
sem kúrir öðrum þjóðum fjær;
dimmir af skuggum dauðans rökkva,
drottinn, til þín hrópum vær:
Líknaðu oss eða láttu sökkva
í leg sitt aftur forna mær!

Hjálmar Jónsson frá Bólu

Sínum augum lítur hver silfrið

2008-03-05T22:05:00.003Z

Daddi var eitt sinn landpóstur. Eða svo var mér sagt. Hann kom á hverjum virkum degi að sækja skammtinn sinn. Stundum kom hann við í fjörunni til að sinna kalli náttúrunnar. Engu máli skipti hvernig viðraði; alltaf kom Daddi. Hann var ekki landpóstur lengur enda löngu búið að skipta þeim öllum út fyrir vélknúin farartæki.

Eitt sinn var aftakaveður, stórhríð og varla hundi út sigandi. Það kom varla nokkur sála enda þjónustan svo sem þess eðlis að flestir gátu beðið til næsta dags með að nýta sér hana.
Svo kom Daddi, eins og venjulega. Ég var örlítið hissa að sjá hann, en þó ekki. Auðvitað lét hann veðrið ekkert á sig fá, landpósturinn sjálfur. Ég hafði þó orð á því við hann hvort veðrið væri ekki alveg brjálað. "Puhhhh!!! það er ekkert að veðrinu" hreytti hann í mig og mér brá svolítið þar sem ég gat ekki betur greint en að það hefði bara fokið í hann við þessa spurningu mína.

Já það er sitt hvað landpóstur eða innipúki þegar dæma á veðurfar!

Dómsdagur

2008-02-20T19:07:00.002Z

Það er allt að fara fjandans til.
Loðnuveiðum hætt. Þorskkvótinn minnkaður. Bankarnir farnir að ráðgera uppsagnir. Í dag heyrði ég jafnvel orðið gjaldþrot nefnt í sömu setningu og Kaupþing! Ekki held ég nú að menn hafi verið að spá bankanum gjaldþroti en bara það að nefna þetta orð í sömu setningu bendir til að farið sé að hitna í himnaríki.

Nú skal segja

2008-02-14T22:19:00.004Z

nú skal segja
hvernig líf mitt hefur verið:
Fór í bæinn, hitti vini
og svo snerist ég bara í hring.

Hvar er hinn mikli andi, bloggandinn?
Jæja þetta verður bara leiðinlegt núna.
Það verður að hafa það.

Fór sem sagt til höfuðborgarinnar og í höfuðstöðvarnar til að kynna mér menn og málefni. Hitti þar fyrir Höllu Björgu, Jónas, Guðrúnu og síðast en ekki síst Þorbjörgu sem fór með mig á heilsustað í hádeginu. Mjög góður dagur í alla staði.

Eftir barning í veðurofsanum á föstudagseftirmiðdegi í umferðarbrjálæði borgarinnar var gott að hitta ættingja, borða góðan mat og eiga notalega kvöldstund með Taggart á skjánum.

Laugardagurinn fór í búðarráp með Gunnu systur eftir ótæpilegt konfektát á Hrafnistu.

Um kvöldmatarleytið hitti ég svo fleiri Bifrestinga í mat áður en skundað var í fertugsafmæli Kallsins. Já Sigurður Björnsson er orðinn fertugur og ekki nóg með það! Hann notaði tækifærið og gifti sig, enda ekki seinna vænna. Hin nýbökuðu hjón voru lukkuleg og allir skemmtu sér hið besta fram á nótt.

Sunnudagsmorgunn var erfiður. Gunna bauð í dögurð sem ekki var af skornum skammti. Þar áttum við systkinin (eða stór partur af okkur), makar þeirra ásamt mömmu, góða stund við át og kjaftagang.

Góð helgi að baki og önnur á leiðinni.

Lifið heil.

Aldur og fyrri störf

2008-02-04T00:41:00.000Z

Ferlegt með öll þessi aðgangsorð sem maður þarf orðið að nota.
Hvernig í veröldinni á maður að muna þetta allt saman?
Enda man ég þau alls ekki öll.
Komst til dæmis ekki inn á bloggið mitt af því ég var búin að gleyma aðgangsorðinu. Þetta stafar auðvitað einnig af þeim möguleika að geta látið tölvuna muna aðgangsorð því þegar maður gerir það þá man maður það náttúrulega ekkert þegar maður svo þarf á að halda. Það er eins með símanúmer. Einu sinni mundi ég öll símanúmer sem ég þurfti að nota nokkuð reglulega. Ennþá man ég númer sem aldrei hafa verið sett inn í minni símans en ég man engin af þeim númerum sem eru til komin eftir gemsavæðingu.

Annars er bara allt fínt að frétta......... eða lítið að frétta... það gerist ekki margt í mínu lífi... sem er hvort tveggja í senn, gott og slæmt.

Góðar stundir

Mitt rétta sjálf

2008-01-16T17:49:00.000Z

Stimplaði rækilega inn mitt rétta sjálf í vinnunni í morgun.
Vaknaði ekki í morgun að öllu leyti. Líkaminn vaknaði og hann baðaði mig og snyrti, borðaði morgunmatinn en EKKERT KAFFI!
Svo kom kaffitíminn.
Fékk mér kaffi og mjólk út í. Tókst í leiðinni að hella slatta af mjólk á höndina á samstarfsmanni. Þar sem ekkert sæti var laust við þetta borð þurfti ég að fara með kaffibollann og leggja hann frá mér á næsta borð. Á því borði voru kertastjakar (tóku um það bil 0,3% af borðfletinum) og mér tókst af minni alkunnu snilld að leggja blessaðan kaffibollann hálfvegis ofan á kertastjaka. Þetta olli því að kaffibollinn valt á hliðina og u.þ.b. 30 cl. af mjólkurblönduðu kaffi láku niður á borðið, þaðan niður á stól og af stólnum niður á gólf.

Í fyrramálið fæ ég mér kaffi áður en ég legg af stað í vinnu!

Helgi

2008-01-13T23:59:00.001Z

Ég trúi ekki að helgin sé liðin. Ég held það hljóti að vera færri tímar í sólarhring um helgar en virka daga.
Af hverju ætli tíminn sé alltaf fljótari að líða eftir því sem maður eldist?
Ég man þegar ég var barn hvað tíminn leið miklu hægar. Það kom fyrir að hann leið hratt, en ég man samt minnst eftir því. Ég man miklu betur þegar tíminn mjakaðist varla á aðfangadag. Og hversu föstudagurinn langi var virkilega langur.

Er reyndar ekki viss um að börn í dag upplifi þetta svona. Nú er hægt að gera alla skapaða hluti á föstudaginn langa, svo sem eins og að hanga í tölvu og jafnvel hitta vinina. Ég man ekki eftir að hafa hitt vinina á svo helgum degi. Einhvern veginn var það svo að maður var bara með fjölskyldunni og enginn kom að spyrja eftir manni: "Viltu vera memm?"
Það var ekkert barnaefni í sjónvarpinu á föstudaginn langa. Engir tölvuleikir. Enginn veraldarvefur. Bara alveg svakalega langur og heilagur dagur í sparifötunum.
Þetta er svona í minningunni en ekki endilega víst að þetta hafi verið alveg svona í raunveruleikanum.

Nýtt líf

2008-01-10T19:37:00.001Z

Tímamótadagur í dag.

Fyrsti vinnudagurinn á nýjum vettvangi hjá KPMG á Akureyri.
Mætti með hnút í maganum en fór heim með bros á vör. Þetta var fínt. Enginn beit mig eða neitt!

Tenerife var fín. Loftslagið átti mjög vel við mig. Er að hugsa um að draga Ísland þarna suður eftir.

Mugison er í sjónvarpinu núna. Mikið rosalega er hann góður! Ég fæ gæsahúð.

Andvaka

2007-12-19T04:35:00.000Z

Ég er andvaka.
Andvaka er skrýtið orð. Hefði að óreyndu haldið að það þýddi að vera sofandi. Að vaka þýðir að vera ekki sofandi og þá hlýtur AND-vaka að þýða að vera sofandi. Einhvern tímann hefur einhver misskilið eitthvað. Eða hvað?

Nú væri sniðugt að vera að vinna vinnuna sína en ég var alltof syfjuð og þreytt til þess þannig að ég fór að sofa. Þá var ég ekki lengur syfjuð, en þreytt var ég og er enn. Datt í hug að ég yrði kannski syfjuð af að blogga pínulítið.
Þetta verður ef til vill endasleppt blogg þar sem ég sofna kannski bara ofan á tölvuna í miðjum klíðum. Vakna svo með hálsríg, slefandi ofan í lyklaborðið.

Ég verð samt að segja ykkur að é...............................................................

Lærisveinar

2007-12-09T17:59:00.001Z

Mamma! lærisneiðar á tilboði!

Mmmmm... lærisneiðar

Á miðanum stendur: Lærisneiðar

Þetta er skrýtin lærisneið:

Og ekki er þessi líkleg:

Áhugavert fólk

2007-12-06T02:28:00.000Z

HRÚTUR 21. mars - 19. apríl
Það fylgir því gæfa þegar fólk hittist í fyrsta sinn. Reyndu að láta það gerast. Jafnvel þótt þér finnist þú ekki félagslyndur núna, heilsaðu þá upp á þá sem þér þykja áhugaverðir.

Skil ekki alveg. Hvernig á ég að vita hver er áhugaverður án þess að hitta viðkomandi?
Ókunnugt fólk hefur vissulega hringt í mig að undanförnu en ekkert af því var vitundar ögn áhugavert!

Rannsóknarsetur

2007-11-30T16:10:00.001Z

Dyngja mín í höllinni er vel búin til rannsókna og hér situr maður lon og don og reynir að vera gáfulegur. Það gengur nú svona og svona......

Rúmið gegnir mikilvægu hlutverki, aðallega sem gagnageymsla og heilaendurvinnslustöð:

Grunnþarfirnar

2007-11-28T20:30:00.000Z

Ég er farin til Kenya
http://www.visir.is/article/20071127/FRETTIR02/71127026

Bless

E.s. getur einhver lánað mér nokkra hundraðkalla?

Ussssss.....

2007-11-24T22:59:00.000Z

... ekki hafa hátt. Fangavörðurinn gæti heyrt í ykkur. Ég er að stelast til að blogga!
Til þess að verða lögfræðingur þarf maður að gerast fræðimaður fyrst.

Þetta er svolítið skrýtið þar sem fæstir lögfræðingar starfa sem fræðimenn. Nú er ég sem sagt í óða önn að berjast við að finna fræðimanninn í mér. Það gengur ekki vel þar sem hann er að öllum líkindum ekki fyrir hendi. Ég held ég sé vinnudýr en ekki fræðimaður. Núna langar mig mest til þess að ná mér í spýtu og nagla og smíða eitthvað. Eða baka fyrir jólin. Eða hvað sem er annað en að sitja í þessum stól og skrifa.

Mig langar að verða heimavinnandi húsmóðir. Vitið þið um einhvern karl á mínum aldri sem vantar húsmóður? Hann þarf að vera fallegur, góður, skemmtilegur og eiga nógu mikið af peningum til að hafa efni á mér sem heimavinnandi húsmóður. Já, hver sagði að þetta væri auðvelt?

Svona fara nú fræðastörfin með mann. Maður er orðinn ruglaður!

Erfðir

2007-11-21T14:20:00.000Z

Nú ætlar Íslensk erfðagreining að fara að selja mér erfðaupplýsingar um sjálfa mig. Ég var ofsalega jákvæð gagnvart gagnagrunni á heilbrigðissviði. Vil gera allt sem í mínu valdi stendur til að finna lækningu og lausnir á sjúkdómum. Hef tekið þátt í nokkrum rannsóknum í sjálfboðavinnu svo Kári kallinn geti fundið lækningu á einhverjum sjúkdómum. Þetta hefur mér þótt sjálfsagt framlag til vísindanna í allra þágu. En nú ætlar Kári kallinn að fara að selja mér upplýsingar um sjálfa mig!
Hann segir að það sé engin hætta á að tryggingafélagið mitt eða vinnuveitendur geti komist í þessar upplýsingar. Hvernig í veröldinni ætlar hann að tryggja það? Hvernig í veröldinni ætlar hann að tryggja það að einhver með sömu erfðaefni og ég og þar af leiðandi sömu tilhneigingu til sjúkdóma, selji hreinlega tryggingafélaginu mínu eða vinnuveitanda upplýsingar um mína erfðaþætti?

Fangelsismál

2007-11-15T21:07:00.000Z

Nýr fangavörður hefur tekið til starfa hér í fræðasetrinu. Mun hans helsta starf verða að halda vísindamanninum að störfum inni í fangaklefanum auk þess að reka hann í reglulega viðringu og hreyfingu. Við óskum Dreng velfarnaðar í hinu nýja starfi.

(Vona bara að hann komist ekki að því að ég hafi bloggað. Hann verður brjálaður!)

Íslendingabók

2007-11-08T17:39:00.000Z

Ég man ekki hvernig það byrjaði, en allt í einu vorum við Drengur Óla komin á kaf í Íslendingabók. Hann stóð við bakið á mér, í bókstaflegri merkingu, og týndi til nöfn á frægu fólki sem ég sló inn jafnóðum. Voðalega er ég eitthvað óskyld fræga fólkinu! Við fundum bara ekki neitt!

En viti menn. Loksins kom að því;
Jón Ásgeir Jóhannesson

er náskyldur mér! Mikið agalega er gott að vita af því...... eða er það ekki?

Dream on Honey

2007-11-03T14:19:00.000Z

Draumahúsið er til sölu. Kostar aðeins tæpar 100.000.000,00 króna. Þetta er ekkert mál. Þarf bara að fá tvo vinninga í Víkingalottóinu. Annan til að kaupa og hinn til að reka.

Mugison

2007-11-01T20:20:00.000Z

Var að horfa og hlusta á Mugison í Kastljósi.
Þetta var snilld!
Maðurinn er snillingur!
Ég fékk gæsahúð!

Áfram Mugison!

Góðir gestir

2007-10-29T16:57:00.000Z

Gestkvæmt hefur verið hér í gamla húsinu um helgina. Þóra Lilja og Rúnar komu í heimsókn á laugardagskvöld og við kjöftuðum frá okkur allt vit fram á nótt. Drifum okkur samt út á lífið seint og um síðir og skemmtum okkur konunglega fram undir morgun. Í gær kom svo Þóra með dóttur sína og nöfnu mína Ingibjörgu Marínu og við fengum okkur göngutúr í góða veðrinu. Rúnar og Dagur voru hins vegar uppteknir við eitthvað boltaspark í sjónvarpinu.
Gengum vítt og breitt um bæinn, skoðuðum í búðarglugga, fengum okkur pylsur, könnuðum húsagerðarlist tuttugustu aldarinnar og björguðum ungum stríðsmanni. Sá var á flótta undan óvinaher sem meðal annars var með boga og örvar að vopni. Ekki dvaldi hann þó lengi undir okkar verndarvæng, bara svona rétt á meðan hann varpaði öndinni augnablik áður en hann hljóp af stað aftur með óvinaherinn á hælunum, geislasverð á lofti og raddböndin þaninn eins og sönnum stríðsmanni sæmir.
Í gærkveldi kom svo Reynir Atli afmælisdrengur, borðaði hjá okkur og fór í bíó með Dreng. Hann gisti svo í nótt á leið sinni suður yfir heiðar eftir vikudvöl á nesinu Langa.
Nú þarf ég að fara að skipta mér af Dreng í eldhúsinu því Þóra og Rúnar eru að koma í kvöldmat.

E.s. Atvinnuviðtöl eru leiðinleg;
"Hvar sérðu þig eftir fimm ár?" Sko ég er engin völva!!!!
"Hvernig telur þú að menntun þín og starfsreynsla nýtist í þessu starfi?" Bíddu! Er ég ekki að sækja um þetta starf af því ég tel að starfsreynsla mín og menntun nýtist í akkurat þetta?!!!
"Hvað heldur þú að meðmælendur segi vera þína veikleika eða styrkleika?" Hvurn andskotann veit ég um það?!!!!!!

Aumingjaskapur

2007-10-25T11:54:00.000Z

Þegar fíflunum fjölgar í kringum þig þarftu að líta í eigin barm. Þetta veit ég og þess vegna lít ég í eigin barm og finn þar einhvern hugsjúkan aumingja. Ég veit það líka að maður má ekki rífa sjálfan sig niður og á að líta á björtu hliðarnar og hafa trú á sjálfum sér. Maður á einnig að reyna að halda á lofti öllu því sem maður hefur áorkað og gert vel en reyna að dvelja ekki við mistökin. Þetta veit ég allt saman en mikið rosalega er stundum erfitt að fara eftir þessu.

Jón Óskar Pétursson

2007-10-19T17:08:00.000Z

Jón Óskar Pétursson býr á Hvammstanga.
Jón, eða Nonni eins og hann er yfirleitt kallaður, eða Nonni kassi eins og hann er oftast kallaður, er maður ágætur.

Hann er að vísu Sjalli en það eru ákveðnir kostir því fylgjandi. Helsti kostur þess er að ég get átt í skemmtilegum þrætum við Nonna við hin ýmsu tækifæri. Ég get sagt; "þetta viltu!" eða "þetta kaustu yfir okkur" eða "þú getur sjálfum þér um kennt!"

Nonni er kjötiðnaðarmaður. Hann er vingjarnlegur maður þrátt fyrir að kannanir hafi leitt eitthvað annað í ljós og það er gaman að gefa honum að borða. Hann lendir í toppsætinu með Halla bróður yfir þá sem njóta matarins sem maður eldar, nánast sama hvað er.

Nonni á myndarlega konu og tvö mannvænleg börn ásamt því að hafa lokið viðskiptafræðinámi frá Háskólanum á Bifröst. Alveg ótrúlegt hvað hann er seigur! Þar að auki er Nonni framkvæmdastjóri Samtaka sveitarfélaga á Norðurlandi vestra. Ekki margir sem hafa svo stóran titil!
Síðast en ekki síst er Nonni vinur minn.

Skjótt skipast veður í lofti

2007-10-18T19:40:00.000Z

Það er ekki að spyrja að umhleypingunum í veðrinu á Íslandi. Í gær var hörkufrost og í dag er 10° hiti. Það er kannski ekki skrýtið að Íslendingar skuli vera eins og þeir eru; umhleypingasamir. Ýmist þjakaðir af þunglyndi eða hamingjusömustu menn í heimi, gráðugir eins og úlfar og grípa gæsina meðan hún gefst. Það er nefnilega aldrei að vita hvernig veðrið verður á morgun. Um að gera að grípa peningana í dag því þeir gætu verið foknir út í veður og vind áður en við er litið.

Mér varð hugsað til gamalla þátta á borð við Dallas, í dag er ég sá fréttir þess efnis að Hafskipsmenn væru að láta rannsaka málin. Í sápuóperum á tímum við Dallasþáttanna voru nefnilega alltaf einhverjir ólánssamir einstaklingar sem voru beittir órétti af hinum ríku, hurfu svo í smá tíma en komu aftur forríkir og staðráðnir í að klekkja á fornum fjendum.
Þess ber þó að geta að ég er alveg hlynnt svona rannsókn ef grunur leikur á að maðkur sé í mysunni. Ég trúi því varla að menn eyði fúlgum fjár í svona rannsókn nema þá gruni að eitthvað misjafnt hafi átt sér stað. Eða hvað?
Svo er alltaf spurning hversu vel er hægt að rannsaka svona löngu liðna atburði.

Haust á Akureyri

2007-10-08T17:05:00.000Z

Mikil veðurblíða hefur verið hér í Eyjafirðinum í dag. Þar sem ég sat úti á svölum með kaffibolla og ..... já kaffibolla og naut útsýnisins fór hitamælirinn í 22 gráður. Í skugga var reyndar aðeins um 5 gráðu hiti en lognið var þvílíkt að ég var að kafna úr hita. Ég hafði vitanlega farið í flíspeysunni út þar sem það er jú komið haust. Svona eiga allir haustdagar að vera!
Í gærkveldi tókum við litla fjölskyldan upp Pictionary spilið og fengum Bryndísi Líneyjar og Þórðardóttur með okkur í leikinn. Við Drengur vorum saman í liði á móti Hildi og Bryndísi. Þær byrjuðu á að stinga okkur af og ég var farin að halda að þær stunduðu einhvers konar leynidulmálssamskipti sín á milli. Svo kom að því að við mæðgin fórum að njóta okkar og hægt og bítandi náðum við í skottið á þeim. Það er skemmst frá því að segja að við sigruðum með miklum naumindum á lokasprettinum eftir spennandi viðureign á lokareitnum.
Við Drengur komum okkur upp nokkrum staðalteikningum, svo sem eins og Bjarna Ármannssyni. En í sumum tilfellum ríkir ákveðin sameiginlegur skilningur á túlkun fyrirbæra. Alveg merkilegt það.

Laufskálarétt

2007-10-02T16:35:00.000Z

Ég nenni ekki að blogga. Spurning að hætta því bara?

Sóley Sigmarsdóttir dreif mig í Laufskálarétt um helgina. Vorum í réttinni á laugardag í yndislegu veðri. Við urðum vitni að því að Geir Jón er friðarins maður þó hann væri augsýnilega í fríi þessa helgi. Það var virkilega skemmtilegt að fylgjast með mönnum og hrossum, borða hákarl og njóta íslenska haustsins eins og það gerist best. Um kvöldið var svo ball í reiðhöllinni. Geirmundur var vitanlega við stjórnvölinn og Bjöggi kíkti við til að hvetja salinn í söng. Að auki skilst mér að hljómsveitin Von hafi stigið á stokk. Dönsuðum af okkur skóna og skemmtum okkur prýðilega. Fórum samt einar heim, aldrei slíku vant.
Sunnudagurinn var dulítið erfiður sökum þreytu en Helga í Lindabæ lét ekki sitt eftir liggja í veitingunum og enginn fór svangur þaðan.

Kíkti á Kaupfélagsmanninn á Króknum áður en ég brunaði í Eyjafjörðinn aftur. Hann var líka þreyttur einhverra hluta vegna.

Er búin að henda inn nokkrum atvinnuumsóknum. Hlakka til að vera hafnað því það er svo gott.

Lifið heil

Fyrsti snjórinn

2007-09-24T13:58:00.000Z

Sit hér heima og reyni að afla mér upplýsinga.
Út um gluggann sé ég fyrstu snjókornin falla.
Þetta eru í það minnsta fyrstu snjókornin sem ég verð vör við í byggð þetta haustið.
Þau ná nú ekki að festast neitt. Gufa bara upp um það bil sem þau lenda á jörðinni.
Það er samt tvímælalaust komið haust.

Tel það tvímælalaust.
Tek ei andmælum létt.
Það er því komið haust.
Þetta er án efa rétt.

Góðar stundir

Stafræn gæði

2007-09-05T22:09:00.000Z

Stafræn gæði. Mestu mögulegu myndgæði. Hver sagði að það væri eitthvað samasemmerki á milli stafrænna mynda og gæða? Mig langar að hitta þann mann. Ég er nú orðin það gömul að ég man tímana tvenna. (Maður þarf reyndar ekkert að vera svo voðalega gamall til þess!) Man eftir því þegar sjónvarpið var að stíga sín fyrstu spor með öllum þeim byrjunarörðugleikum sem fylgja slíku. Þá voru myndgæðin oft af skornum skammti og algeng húsráð að slá í kassann og fikta í loftnetinu. Nú eru auglýstir betri tímar með blóm í haga; stafræn gæði. Jú, jú maður er auðvitað með nýjustu tækni og stafrænt sjónvarp í gegnum nettengingu en gæðin........... þau láta á sér standa. Ég hef ekki upplifað slík myndgæði frá því ég var barn!

ÉG VIL FÁ LOFTNETIÐ AFTUR !!!!!!

Afmæli

2007-09-03T15:28:00.000Z

Þessi snillingur og vinur minn á afmæli í dag:

Þetta er hann Hermann Ósland Þorvaldsson og hann er fimm ára í dag. Til hamingju með afmælið Hemmi!
Þegar ég hitti hann fyrst var hann rétt farinn að ganga. Þá strax orðin einstaklega skýr og skemmtilegur. Það hefur sko ekkert lagast nema síður sé.
Það er eins með mömmu hans og aðrar rollur; bara einn fengitími á ári. Hermann gæti því fengið bestu afmælisgjöf sem hægt er að hugsa sér; litla systur. Vona samt að hann fái líka eitthvað skemmtilegt dót

Jarðbundin... og þó

2007-08-26T00:06:00.000Z

Ég er nú frekar jarðbundin og trúlaus. Hef þó gaman að allskonar hindurvitnum, þar á meðal stjörnuspá. Ansi oft hittir stjörnuspá Moggans naglann á höfuðið:

Hrútur: Þú ert í skapi til að ljúka síðasta tímabili lífs þíns og byrja á nýju. Þú lendir í furðulegu umhverfi með nýjum andlitum. Notaðu húmor til að brjóta ísinn.

Stundum held ég að höfundur stjörnuspárinnar sé einhver mér mjög nákominn sem fylgist með lífi mínu.

Annars hélt ég að Viktoría og Davíð ættu tvö börn, er það vitleysa í mér?: http://mbl.is/mm/folk/frett.html?nid=1287469

Lífið er stutt, dauðinn þess borgun

2007-08-19T17:25:00.000Z

Drekkum í dag og iðrumst á morgun, söng Pálmi Gunnarsson fyrir margt löngu.
Hversu oft hefur maður ekki lifað samkvæmt þessu, meðvitað eða ómeðvitað? Ennþá er maður þó á lífi. Í hvert sinn sem ég beiti þessari kenningu á hina mikilvægari þætti í lífi mínu verð ég ein taugahrúga og er alveg viss um að mér komi til með að hefnast fyrir það. Jú, jú það hefur nú svo sem gerst en trúlega í færri tilfellum en fleiri. Eða hvað?
Þá er spurningin hvort það gerist ekki bara ef maður býst við því. Hvað ef maður hugsar: "Þetta er hárrétt ákvörðun sem á bara eftir að verða mér til góðs"? Getur það verið rétt sem ýmsir halda fram að maður geti, með hugsunum sínum einum, stjórnað örlögum sínum? Ef ég hætti að búast við hinu versta verður þá ekki allt gott?
Kannski ég reyni og þá kemur það í ljós

Hárþurrka óskast

2007-08-13T21:03:00.000Z

Fór til Akureyrar og afþýddi tvo frysta. Þar sem ég var bara í helgarleyfi en ekki sumarleyfi hafði ég ekki alveg tíma til að bíða eftir að klakinn bráðnaði og brúkaði því minn góða kínverska keppnisblásara í verkið. Hann virkaði fínt. Það er hins vegar skemmst frá því að segja að þegar ég ætlaði að blása á mér hárið í morgun var blásarinn gjörsamlega látinn/andaður/dáinn/dauður/óvirkur........!!!!!!!

Skrapp einnig á Fiskidaginn á Dalvík. Það var snilld. Ofsalega góður matur og ekki spillti fyrir að hann var alveg ókeypis. Af hverju er ekki meira um skyndibita í formi fisks á boðstólum? Allir á kafi í heilsurækt af ýmsum toga og þar ætti fiskurinn að koma sterkur inn. Að auki er mjög fljótlegt að elda hann, svo ég tali nú ekki um hvað hann er góður og fer vel í kroppinn.

Fordómar

2007-08-05T12:53:00.000Z

Kíkið á þetta

Nágranninn

2007-07-29T18:49:00.000Z

Það er Maríuerla að vappa fyrir utan gluggann. Hún er með tvo unga með sér. Annar er voða sprækur og skoppar um allt, en hinn kúrir bara og bíður eftir að mamma komi og mati hann á einni vænni pöddu. Ég hef oft séð hana vappa hér fyrir utan en þetta er í fyrsta sinn sem ég sé ungana með henni. Þegar maður fer út, skoppar hún í austurátt. Það segir mér að hreiðrið hennar sé einhvers staðar vestan við okkur.

„Maríuerlur eru algengir fuglar á Íslandi enda stofnstærð að sumri um 100.000 pör. Maríuerlur eru farfuglar sem hafa vetursetu í Afríku. Maríuerlur koma upp úr miðjum apríl en varptíminn er seinni hluta maí og fyrri hluta júní. Eggin eru 6-7 en maríuerlur verpa gjarna í húsum og mannvirkjum ýmis konar. Kjörsvæði maríuerla er kringum vatn og við mannabústaði en einnig í kjarrlendi og í hraunum. Þær lifa á skordýrum sem þær ýmist grípa á lofti eða tína upp af jörðinni en einnig vatna- og landbobbum. Maríuerlur eru alfriðaðar enda skaðlausir smáfuglar sem auðga lífríkið og eru mikið augnayndi.“

(Heimild: http://www.islandsvefurinn.is/pages/alife/birds/birdpages/mariuerla.html)

Sumarpróf

2007-07-25T17:40:00.000Z

Jæja, nú er fyrsta sumarprófinu lokið. Það var í Evrópskum félaga- og skattarétti og ég held það hafi bara gengið fínt.
Áður en ég fór í prófið fannst mér ég ekki muna neitt. Var alveg viss um að ég væri komin með alvarlegan heilasjúkdóm sem væri þess valdandi að ég gleymdi öllu sem ég heyrði og las.
Annað kom þó á daginn og ég mundi bara býsna mikið og held ég þurfi ekki að hafa áhyggjur af falli. Við skulum þó spyrja að leikslokum því eigi er kálið sopið þó í ausuna sé komið.

Nú sitjum við Sóley og hlustum á Ljótu hálfvitana, drekkum görótta drykki og bíðum eftir að kjúklingurinn andist í ofninum.

Þetta er indælt!

Brjálað að gera...

2007-07-23T21:02:00.000Z

...en þegar sumir heimta blogg (nefni engin nöfn en tel mig hafa hag af því að halda viðkomandi góðum) er mál að bregðast við. Enda bloggandinn að komast yfir mann þar sem prófalestur stendur sem hæst. Er núna í Evrópskum félaga- og skattarétti og munnlegt próf í því á miðvikudag. Lítill tími til undirbúnings þannig að svefn verður að sæta afgangi.

Annars lítið að frétta, vitanlega, þar sem lífið snýst um lærdóm þessa dagana. Það var afar erfitt tvo fyrstu dagana þar sem maður var ekki viss hvort maður væri á Íslandi, þvílík var veðurblíðan. Veðrið hefur heldur skánað fyrir þá sem þurfa að hanga inni og engu líkara en veðurguðirnir hafi gengið til liðs við meistaranema á Bifröst því það rignir sem aldrei fyrr.

Lifið heil

Ókeypis lestur

2007-07-10T11:23:00.000Z

Hvað hefur orðið um orðið ókeypis?
Einu sinni voru hlutirnir ókeypis. Eða jafnvel gratís. Í dag eru þeir fríir.

Hitt og þetta

2007-07-04T16:41:00.000Z

Endurhæfing mín þetta stutta sumarfrí hefur ekki síst falist í því að koma sem minnst nálægt þessari tölvuskjátu. Það er því helsta afsökun mín fyrir bloggleysinu undanfarið.

Annars hefur ýmislegt á daga mína drifið.
Fór vestur í fjörðinn fagra með móður minni og nokkrum afkomendum hennar til að vera viðstödd fermingu bróðurdóttur minnar, hennar Lilju Kristínar.
Það var góð ferð. Reyndar varla hægt að hugsa sér betri ferð. Sólin skein og hitinn var í hámarki. Við gistum hjá henni Jónu í Alviðru, í húsi sem heitir Leiti. Það var hreint til fyrirmyndar með vinnukonu og allt! Fórum í sund á Þingeyri, lágum í sólinni og heimsóttum nokkra ættingja en því miður ekki alla. Gerum það bara næst. Keyrðum inn í botn, skoðuðum Skrúð, Frændgarð og nutum þess að vera saman í fallegasta umhverfi í heiminum og þó víðar væri leitað.
Alger synd ef eina úrræðið sem þessari annars snjöllu þjóð dettur í hug er að koma fyrir olíuhreinsunarstöð á svona fallegum stað. Bjössi frændi Drengsson hundabóndi í Fremri Breiðadal var með betri hugmynd að nýtingu húsakostsins að Núpi; fangelsi eða meðferðarheimili. Okkur vantar jú alltaf úrræði fyrir ógæfufólkið okkar og þess háttar starfsemi ætti að skapa þó nokkuð af störfum.

Átti góðan dag með mömmu á Húsavík á mánudaginn. Meira um það síðar. Þarf að fara að skjótast að kaupa hallarmál.

Halló Akureyri

2007-06-10T12:11:00.000Z

Þá hef ég verið viku á Akureyri. Það er fínt. Búið að vera nóg að gera og ekkert lát á önnunum.
5tindamenn gengu á Kerlingu á laugardag. Drengur fór á undan ásamt föður sínum til að mynda komu þeirra á fjallið. Allt gekk vel og veðrið var yndislegt. Eftir langa og stranga göngu komu þeir allir hingað að borða matinn sinn. Mikið var yndislegt að hafa fulla íbúð af FJALLmyndarlegum karlmönnum!

Ég hef verið haldin algeru andleysi undanfarið. Mig hefur langað til að blogga en bara ekki getað það. Finnst það verra þar sem ég hef hugsað mér að nota þetta blogg sem einskonar dagbók fyrir mig að lesa síðar og rifja upp liðna tíma. Ég man nefnilega aldrei neitt stundinni lengur og því er gott að geta bara flett því upp.

Yndislegt veður á Akureyri í dag. Sólin skín og hægur andvarinn hvílir sig og leyfir logninu að njóta sín.

Veraldarvefurinn

2007-05-24T11:34:00.000Z

Veraldarvefurinn er eins og ísskápur.
Maður opnar hann aftur og aftur í leit að hinu óvænta.

Stundum hata ég tölvuna mína. Tölvan á ekki skilið þetta hatur. Hún gerir ekkert af sér. Það er ég sem stjórna. Eða ætti að stjórna. Ég ætti að hata mig en ekki tölvuna. Hataðu glæpinn en ekki glæpamanninn. Hef reyndar aldrei alveg skilið þetta. Verður glæpur án glæpamanns? Hver er glæpamaðurinn í tilfelli tölvunnar? Notandinn? Á ég þá ekki að hata mig heldur það sem ég geri?

Já. Það er líklega þannig

Myndavandræði

2007-05-20T21:01:00.000Z

Ég get ekki sett myndir á myndasíðuna mína. Búin að taka töluvert af myndum en tekst ekki að setja þær út á netið.

Dæmi:

Hvað á ég nú til bragðs að taka Búkolla mín?

Kosningavaka Hamragarða

2007-05-13T00:06:00.000Z

Brjálað stuð í Hamragörðum 407. Hér stendur yfir kosningavaka og stemningin er gríðarleg. Hér höfum við setið, ég og stjórnsýslurétturinn og átt í mjög svo nánu sambandi með kosningasjónvarpið á kantinum. Það reyndist okkur ekkert erfitt að hunsa júróvisjón og stunda heita ástarleiki, málefnalega, lögmæta, með miklu meðalhófi þar sem jafnræðis var gætt í hvívetna. Það reynist mér heldur erfiðara að láta Alþingiskosningarnar framhjá mér fara.

Sú herkænska Sjálfstæðisflokksins að sitja aðgerðarlitlir á kantinum á meðan Framsókn tók við kjaftshöggum fyrir það sem miður fór við stjórnina, virðist vera að skila tilætluðum árangri. Það er sem sagt greinilegt að þeir sem kjósa sjálfstæðisflokkinn er nákvæmlega sama um biðlista eldri borgara, geðsjúkra og aðra sem minna mega sín. Framsóknarmenn hafa greinilega greindara fólk í kjósendaliðinu sem refsar fyrir slælegan árangur. Vissulega er ég ánægð með refsingu framsóknarmanna á sínum flokki en ég hefði bara viljað að sjálfstæðismenn fengju álíka refsingu.

Hvað um það. Ég á vini á báðum stöðum sem að bíða mín í röðum ..... til að hella yfir mig skömmum væntanlega. Ég er sátt.... og Sóley, Þú mátt gráta við öxlina á mér :)

Ég horfi hins vegar björtum augum til framtíðar. Ég hlakka til að komast beint inn á elliheimilið þegar ég þarf á að halda. Ég hlakka til þegar Hulda fær fyrir hjartað og kemst í aðgerð "med det samme". Ég hlakka líka til þegar sá ómissandi hópur sem vinnur skítverkinn verður metinn að verðleikum og menn gera sér grein fyrir því að til þess að reka banka með himinháum hagnaði þarf einhver að skúra, einhver að skipta um ljósaperur og vissulega þarf einhver að gæta barnanna og hugsa um afa og ömmu.

Jæja nú er stjórnsýslurétturinn orðinn æfur af afprýðisemi og farinn að hóta falli.

Húð og hitt

2007-05-11T13:50:00.000Z

Hvað gerir maður ef maður þarf að hitta húð og hitt og fær ekki tíma fyrr en seinnipartinn í júlí?

Græjur

2007-05-09T17:33:00.000Z

Sonur minn flytur inn og selur græjur hér: http://www.portus.is/
Þetta eru mjög góðar græjur. Á góðu verði.
Fyrir þá sem taka hljómgæði fram yfir annan hégóma er þetta það besta.
Fyrir alla aðra er þetta líka það besta.

Hitt og þetta

2007-05-06T18:24:00.000Z

Les mbl.is reglulega. Undanfarið hef ég rekist á villur sem er varla hægt að afsaka.

Til dæmis þetta:
"Áformað er að Sarkozy flytji sjónvarpsárás og sigurhátíð er....." Hvað er sjónvarpsárás?

Annað:
"Þegar lögregla kom á vettvang og reyndi að komast inn í íbúð mannanna hleypti sá látni af einu skoti"

Annars fór ég á Þingvöll í gær með Sigurði Líndal og Mellunum. Það var afar fróðlegt og mjög skemmtilegt. Hann veit bókstaflega allt um allt!

Kannski kemur meira um það síðar ... ég segi kannski því nú nálgast prófin og því þarf ég trúlega að einbeita mér að undirbúningi þeirra.

Annars er Sóley Sigmarsdóttir frá Sólheimum í (einhver hreppur sem byrjar á S) í Sæmundarhlíð í Skagafirði að hugsa um að launa mér lambið gráa. Forvitnilegt að frétta hvernig það fer.

Íslenska 101

2007-05-03T23:39:00.000Z

Hér er lítri
um lítra
frá lítra
til lítra

Hér er mjólkurlítri
um mjólkurlítra
frá mjólkurlítra
til mjólkurlítra

Hér er enginn mjólkurlíter
ekki um neinn mjólkurlíter
né frá neinum mjólkurlítera
og þaðan af síður til mjólkurlíters

Sama gildir um metra. Nema kannski mjólkumetra..... veit ekkert um þá.

Ég VIL mjólk, hann VILL mjólk, þau VILJA mjólk

Fleira er ekki í þættinum í kvöld
verið þið sæl

Tíminn

2007-05-03T18:25:00.000Z

Tíminn líður hratt á gervihnattaöld
hraðar sérhvern dag
hraðar sérhvert kvöld
Ertu stundum hugsandi......tralalallallalllalllalala

Það er bæði gott og slæmt hversu tíminn flýgur áfram. Gott af því þá þarf maður sjaldan að bíða lengi eftir skemmtilegheitum ýmis konar. Slæmt af því þá hefur maður aldrei nægan tíma til að gera allt sem maður þarf að gera í þessu lífi.

Tíminn líður því hraðar sem maður eldist. Nú er svo komið að mér finnst tíminn hreinlega hlaupa frá mér og stundum finnst mér eins og ég hafi hreinlega misst út dag eða tvo.

Í skólanum, í skólanum, er skemmtilegt að vera

2007-04-30T01:34:00.000Z

Mig langar ekki að vera bókaormur. Mig langar að vera garðyrkjumaður og vera úti og vinna með líkamanum. Ég er ekki hönnuð til að sitja yfir bókum. Ég er hönnuð til að gera eitthvað líkamlegt.

Ef ég væri garðyrkjumaður væri ég örugglega núna að skrifa um það hvað mig langaði að sitja yfir bókum í einhverri þægilegri innivinnu. Svona er lífið. Grasið alltaf grænna hinum megin við ána.... eða girðinguna eða hvað það nú var .

Kannski er meðalhófið bara best í þessu sem öðru. Ef til vill ætti maður að vinna hálfan daginn úti, með líkamlegum tilburðum og hinn helminginn sitja inni yfir bókum eða þvíumlíku.

Annars er ég að rembast við að skrifa ritgerð í réttarsögu. Það gengur hægt. Nema hvað. Til að skrifa þessa ritgerð hef ég aflað mér ýmissa heimilda og þar á meðal greinarkorns sem birtist í Morgunblaðinu í ágúst árið 1960. Á síðu þeirri í blaðinu er greinin birtist er einnig dálkur sem nefnist Velvakandi en þessi dálkur mun enn vera við lýði á blaðinu eftir því sem ég best veit.

Í þessum Velvakanda er svohljóðandi fyrirspurn birt:

Afgjald af ferðatækjum

Hlustandi skrifar: - Ég væri afar þakklátur, ef Velvakandi vildi svara eftirfarandi spurningum:
Ég á bíl, sem ekki er með útvarpstæki, en þegar ég fer í honum tek ég stundum með mér lítið ferðatæki, sem hafa má í vasanum. Þarf ég að borga afnotagjald af notkun þess þar? Það skal tekið fram, að ég á annað útvarpstæki heima hjá mér, sem ég greiði venjulegt afnotagjald af.
Nú tek ég vasa útvarpið með mér í bílinn án þess að nota það þar. En ef við setjumst einhvers staðar niður úti við til að fá okkur kaffi, og hlustum á útvarpið á meðan, er sú notkun þá gjaldskyld?
Að lokum: Þurfa menn að borga afnotagjald fyrir að ganga á götum úti með vasaútvarp í skyrtuvasanum og hlusta á ríkisútvarpið?

Svar Velvakanda á þessu var eitthvað á þá leið að borga þurfi afnotagjald af viðtækjum í bílum en hlusti menn á ferðaviðtæki yfir kaffi úti í náttúrunni sé notkun þess gjaldfrjáls og eins geti menn útgjaldalaust hlustað á Útvarp Reykjavík er þeir ganga á götum úti með ferðaviðtækið sitt í vasanum.

Þess má að lokum geta að Ríkisútvarpið Sjónvarp hóf útsendingar nokkrum árum eftir þetta.

Leigumóðir og leiguníðingar

2007-04-23T19:20:00.000Z

Er eitthvað vit í því að fá sér leigumóður á Íslandi? Er landið ekki alltof lítið til þess?
Vildi maður hitta leigumóðurina í Bónus á föstudögum? Eða vill maður vera leigumóðir og rekast á barnið og foreldrana hvar og hvenær sem er?

Það er vitanlega fjöldinn allur af spurningum sem vakna við þessar umræður. Ég er bara ofsalega fegin að þurfa ekki að nýta mér þetta.

Hvað eigum við að gera varðandi óþokka sem misnota erlenda verkamenn hér á landi í gróðaskyni?

Hvað á að gera við fólk sem situr og bloggar eitthvað bull í stað þess að læra heima?

Jarðarför og afmæli

2007-04-16T22:33:00.000Z

Mig langar til að lagið Everybody hurts með REM verði flutt á jarðarförinni minni. Er ekki alveg búin að hugsa út hver ætti að syngja það ef REM kemst ekki, en Björn Jörundur kemur sterkur inn. Svo vil ég fá Megas og Diddú. Vildi líka að Björk tæki eins og eitt lag í stíl við Gling-Gló.
Ég er ekkert að fara að drepast. Eða ég vona ekki, en ég vildi bara koma þessu á framfæri meðan ég man.

Annars hélt ég afmælisveislu á laugardagskvöldið. Ég átti sem sagt afmæli og svo hefði pabbi orðið 75 ára þann 12. apríl hefði hann lifað. Það var sem sagt ærið tilefni til að smala saman systkinum mínum og þeirra mökum og gera sér glaðan dag.

Þetta var hin besta veisla. Gunna lánaði húsnæði og Drengur Óla kom að norðan og eldaði góðan mat. Gunna bakaði líka franska súkkulaðiköku í eftirrétt og Mummi dró fram eldgamla viskýið sitt og ennþá eldra koníak. Það var því kátt á hjalla alveg fram yfir miðnætti. Já ég veit.... við erum orðin gömul.

Mér bárust margar góðar gjafir. Náttföt og inniskó frá systrum mínum og eyrnalokka frá Siggu og Tímo frá Steinarri og Hjördísi. Það sem var mest sláandi var að afgangurinn af gjöfunum var rauðvín, hvítvín og rauðvínsglös, ásamt peningi frá mömmu sem vitanlega fer í að kaupa meira rauðvín... eða hvað?

Mig langar að þakka öllum sem áttu þátt í að gera þennan dag svona góðan og þar með þeim sem sendu mér kveðju eða hringdu í mig.

Páskar

2007-04-11T21:58:00.000Z

Þetta voru heldur viðburðarríkir páskar. Skipulagið var á þann veg að ég ætlaði að hafa það huggulegt á Akureyri, lesa námsefnið og slappa af. Sú varð ekki raunin.

Á fimmtudag, skírdag, var brunað austur á Vopnafjörð og þar tekin ein fermingarveisla. Berglaug Petra, hin bráðmyndarlega dóttir Þórdísar (föðursystir Drengs) og Garðars var fermd þennan dag. Þetta var svakalega fín veisla með dýrindis fæðu og drykk. Ég lenti reyndar í afar pínlegri reynslu þar sem gjöfin frá mér innihélt aðeins tóman skartgripakassa. Það voru auðvitað allir veislugestirnir sem fylgdust með þegar pakkarnir voru opnaðir og ekki mjög skemmtileg augnaráð sem mættu mér úr öllum áttum. Þetta er í síðasta sinn sem ég læt pakka inn gjöf í búðinni!
Nú er bara að sjá hvort verslunareigandinn standi sig áður en ég greini nánar frá málinu í smáatriðum.

Frá Vopnafirði lá leiðin norður á Þórshöfn þar sem beið mín uppbúið rúm og alkunn gestrisni á Hóteli Sollu. Drengirnir skoðuðu skemmtanalífið á Þórshöfn en ég var tiltölulega róleg enda kvefið ekki alveg að gefa sig. Það var gott að vera á Þórshöfn hjá Sollu, stjanað við mann í hvívetna og skemmtilegur félagsskapur. Hitti mann og annan, fékk gott kaffi hjá Birnu og afmælisveislu hjá Diddu, hvort tveggja í fylgd Heiðrúnar.

Drengirnir gerðu hlé á djamminu til að skreppa út á Langanes. Mér skilst að það hafi verið hin besta ferð í fylgd Reynis Atla og Ágústar Marinós.

Aftur var haldið í höfuðstað Norðurlands á laugardag. Fengum engin páskaegg þar sem akureyskir innkaupastjórar höfðu ekki gert sér grein fyrir því að bæjaryfirvöld voru búin að bjóða öllum landslýð á skíði, í leikhús og aðra menningu í þessum mikla páskaskíðamenningarbæ.

Á laugardagskvöld var okkur boðið í mat til þeirra heiðurshjóna Esterar og Árna. Þar var Drengur í hlutverki yfirkokks og eldaði þennan líka fína humar. Þetta var afar velheppnað kvöld, góður matur og skemmtilegt spjall.

Á páskadag voru piltar slappir einhverra hluta vegna en Drengur þó sínu verri en Stefán. Þeir voru þó farnir að hressast seinnipartinn enda eins gott því fyrir dyrum stóð eldamennska á ótal veisluréttum.

Við erum nefnilega öll ansi miklir matgæðingar og því var úr vöndu að ráða þegar velja átti páskamatinn. Það varð því úr að keypt var sýnishorn af nokkrum tegundum. Þeir elduðu svo drengirnir forrétt úr fasana, önd, hörpuskel og akurhænu. Þetta var með betri forréttum sem ég hef smakkað. Þegar búið var að borða forréttinn var hann látinn setjast í maganum í nokkra stund áður en hafist var handa við aðalréttinn. Þar var um að ræða kengúrukjöt með rótargrænmeti, villisveppasósu og kartöflum. Þetta var líka með betri mat sem ég hef fengið.
Í eftirrétt var svo súkkulaðikaka með ís og páskaeggi. Já.... við fengum sitt páskaeggið hvert.... af minnstu gerð.
Ég held að mér sé óhætt að segja að þessi páskadagur hafi verið með þeim betri sem gerast.

Akureyri

2007-04-03T01:27:00.000Z

Ég er komin til Akureyrar.
Stefán frændi minn Drengsson kom á Bifröst og við fórum þaðan saman hingað til Akureyrar til elsku litla Drengsins hennar mömmu sinnar.
Skipulagið var á þann hátt að ég ætlaði að skella mér til Reykjavíkur á föstudaginn var, hitta þar mann og annan og fara svo á ráðstefnu í Norræna húsinu á mánudagseftirmiðdag. En svo var ég orðin lasin á föstudag. Náði mér í einhverja kvefpest og hélt mig bara á Bifröst með snýtuklúta alla helgina.
Nú er ég sem sagt hingað komin í 13 stiga hita á miðnætti. Kvefið er ekki orðið gott en ég vona nú að ég losni við það fljótlega. Alveg ferlegt að eyða páskafríinu í þennan óþokka.

Gleðilega páska elskurnar mínar til sjávar og sveita

Rammi og ritstífla

2007-03-29T00:13:00.000Z

Ég hef komist að því að eftir að ég ákvað að bloggið mitt ætti að verða dagbók þá get ég ekkert skrifað. Það sem ég skrifa innan ramma dagbókar það er bara leiðinlegt. Þannig að ég er hætt að hafa þennan ramma og ætla bara að skrifa það sem mér dettur í hug þegar mér dettur það í hug. Þetta verður sem sagt bara einhvern veginn.

Var að koma heim eftir vel heppnaðan kvöldverð Emmellinga 2006. Borðuðum læri og alveg gríðarlega góða súkkulaðiköku. Allt alveg svakalega gott.

Í fyrramálið er svo Sissi Lín snillingur í réttarsögu.

Blogg

2007-03-25T08:54:00.000Z

Hvað er blogg?
Hvað á blogg að vera?
Er ekki nokkur leið að finna betra orð yfir þetta?

Þessa dagana er hinn merki maður Sigurður Líndal að kenna okkur réttarsögu. Í gær fjallaði hann meðal annars um heimildir og hversu ábyggilegar þær væru. Heimildir geta verið nákvæmar og sannar eða hreinlega falsaðar og allt þar á milli.

Sigurður kom einnig aðeins inn á nýyrðasmíð og taldi það afar gagnlegt að búa til ný orð. Þegar ný orð eru búin til þarf nefnilega að rannsaka merkingu þeirra og skilja. Hann hefur verið býsna liðtækur á þessu sviði og gæti ég trúað að það sé einn þáttur í því hversu vel hann er að sér í lögum og sagnfræði. Ef maður grefur svona niður í merkingu orða sem nýyrðasmíði krefst þá hlýtur maður að skilja hlutina betur og þar af leiðandi muna þá betur.

Því er það svo að ég fór að velta fyrir mér ofangreindum spurningum. Til að skilja hvað blogg er væri ekki vitlaust að finna yfir það nýtt orð, betra orð, orð sem er meira lýsandi. Til að finna nýtt orð yfir blogg þarf hins vegar að rannsaka blogg og komast að því hvað það er í raun og veru. Það er nefnilega þannig með blogg að þau verða heimildir framtíðarinnar. Það er að segja ef þau varðveitast.
Ef þau koma til með að varðveitast eiga sagnfræðingar framtíðarinnar eftir að velta þeim fyrir sér og álykta út frá þeim um líf okkar og menningu.

Ég ætla hins vegar ekki að fara í þá vinnu á þessum tímapunkti, geri það ef til vill þegar ég kemst á ellistyrkinn. Hins vegar hef ég lesið reiðinnar býsn af þess háttar skrifum og orðið vör við gagnrýni á þau.

Ef maður flokkar lauslega bloggskrif Íslendinga á liðnum árum kemst maður fljótt að því að flestir, ef ekki allir flokkar þess hafa verið gagnrýndir. Þeir sem nota bloggið sem dagbók og rita í það flest það sem gerist í daglegu lífi viðkomandi, eru gagnrýndir fyrir það og rökin sem notuð eru eitthvað í þessa veruna: "Hver haldið þið að vilji lesa um allt sem á daga ykkar drífur?" og "Hverjum kemur þetta við" Þetta eru síður en svo haldgóð rök.
Ef ég kýs að skrifa eitthvað á veraldarvefinn þá er öllum velkomið að lesa það en það er langt í frá að fólk þurfi þess. Fólk getur sleppt því.

Þeir sem gefa út skrif sín á veraldarvefnum þurfa hins vegar að gera sér grein fyrir því að allir geta lesið þau. Því þarf að gæta sín á því hvað skrifað er um annað fólk. Þar með talið það fólk sem hugsanlega er persónur í lífi viðkomandi. Dettur mér fyrst í hug í þessu sambandi börn, foreldrar og vinir. Fólk sem á þátt í daglegu lífi manns vill kannski ekkert endilega vera persónur í frásögnum manns, sem allir geta lesið um.
Um þetta gildir hið fornkveðna; "Aðgát skal höfð í nærveru sálar"

Hvað sem því líður þá hef ég komist að þeirri niðurstöðu að fyrst ég nenni á annað borð að skrifa eitthvað (þegar ég nenni) þá er jafngott að þau skrif séu á einhvern hátt heimild um líf mitt. Ég geti þá í framtíðinni flett upp í þessum skrifum mínum og rifjað upp líf mitt í stórum dráttum.
Ég áskil mér hins vegar allan rétt til að breyta þessari afstöðu eða bregða út af henni. Þetta eru jú mín skrif.

Að lokum þetta; Sigurður Líndal er snillingur!

Prump

2007-03-19T09:18:00.000Z

Hún gekk upp stigann með frumburðinum. Hann ætlaði að eyða stund með frændum sínum á meðan hún spjallaði við frænku. Þetta hefur verið á öndverðri 20. öldinni, líklega sjöunda áratugnum og drengirnir líklega milli tektar og tvítugs. Þau heyrðu skræki og fliss út úr einu herberginu og opnuðu dyrnar:

Endurskoðandinn prumpaði.
"Tvö tvö fyrir mér!"

Héraðslæknirinn prumpaði:
"Þrjú tvö og blautt með"

Hún er enn að hlæja að þessu fjörtíu árum síðar

Gáta

2007-03-15T13:52:00.000Z

Þegar ég hungraður bið um brauð
bíður mér heimurinn steina.
Hjá þér finn ég minn falda auð,
fegurstu blómin er hugði ég dauð
í gróðurreit mannlegra meina
fjallið mitt fjallið eina

Eftir hvern er þessi vísa?
Hver er lausn gátunnar?

Úti er alltaf að snjóa

2007-03-14T23:16:00.000Z

Ekki gráta elskan mín þó þig vanti vítamín........
Á ekkert að fara að koma vor?

Mig vantar efni í meistararitgerð. Einhverjar hugmyndir?

Ég er búin að komast að því að ég er alveg búin að missa karmað í munnlegum prófum. Verð bara eins og hálfviti um leið og ég geng inn í stofuna og stama og hiksta eða þegi bara alveg.
Sóley kom með þá getgátu að ég hefði skilið karmað eftir á Tongren Lu í Shanghai.
Spurning að fara út og sækja það?

Próf Próf Próf Próf Próf Próf Próf Próf Próf

2007-03-11T11:20:00.000Z

Af hverju þarf ég að taka próf. Af hverju má ég ekki bara fljóta í gegn. Ég get bara flett þessu öllu upp þegar ég er byrjuð að vinna. Ég réði mig að vísu aldrei ef ég hefði aldrei tekið próf. En það getur vel verið að einhver vilji samt ráða mig. Þó ekki væri nema fyrir útlitið. Og þó ... ekki útlitið kannski ... en fyrir kannski aðra eiginleika....

Sem sagt; þrjú munnleg próf í næstu viku!

Soðinn þorskur með sméri

2007-03-07T15:27:00.000Z

Fékk mér í gærkveldi soðinn þorsk með soðnum kartöflum. Út á fiskinn setti ég ógrynnin öll af sméri.
Borðaði með þessu einnig ristað brauð með miklu sméri. Fiskur er góður og fiskur er afar hollur.
Fiskur með miklu sméri er afar góður en ekki nógu hollur fyrir mig. Blóðfitan er víst alltof há.

Hvað get ég borðað með soðnum þorski og kartöflum sem er ekki eins óhollt fyrir mig og smér en samt jafn gott?

Umhverfið allt á yfirsnúningi

2007-03-05T23:03:00.000Z

Mér líður eins og allt sé á yfirsnúningi nema ég. Ég er bara í slow motion. Alein í slow motion.
Ég lít til vinstri. Lít svo á úrið. Lít til hægri og aftur til vinstri. Aftur á úrið. Það líður klukkustund.

Þegar ég var lítil var föstudagurinn langi raunverulega langur. Þá skildi ég alveg af hverju hann var kallaður föstudagurinn langi. Aðfangadagur var einnig nær óendanlegur. Nú eru allir dagar jafn assgoti stuttir. Samt er sagt að ekkert hafi breyst... að enn séu 24 tímar í hverjum sólarhring.

Ég held það sé verið að gabba mig.

Ofnæmi

2007-02-26T09:52:00.000Z

Hef náð að koma mér upp þessu líka fína ofnæmi. Grunur beindist fyrst að gamla maskaranum mínum þar sem einkennin voru aðallega í kringum augun. Svo ég fjárfesti í nýjum rándýrum maskara. Daginn eftir var hins vegar allt andlitið á mér orðið hreistrað þannig að grunur fór að berast að andlitsfarðanum (meikinu).

Ég sé þannig fram á heilmikla rannsókn á andlitinu á mér. Þarf að fjárfesta í nýjum andlitsfarða og gera tilraunir með hann.

Ekki get ég sleppt því algjörlega að mála mig þar sem nýjustu rannsóknir hafa leitt það í ljós að mín náttúrulega fegurð sé eitthvað farin að fölna.

Eymingjar á þorrablóti

2007-02-19T12:30:00.000Z

Það er skemmst frá því að segja að ég vaknaði ekki upp við bónorð og blómvönd á konudaginn.

Skil það núna af hverju systur mínar tvær komu karlmannslausar í bæinn eftir vetrardvöl á Húsmæðraskólanum að Löngumýri.

Skagfirskir karlmenn eru bleyður!

Þetta er langstærsta þorrablót sem ég hef farið á og fyrsta þorrablótið þar sem ég þurfti ekki að beita neitunarvaldinu á menn sem vildu bjóða mér upp í dans.

ÞAÐ BAUÐ MÉR ENGINN UPP Í DANS!
Trúið þið því?

Annars var þetta mjög skemmtilegt blót, Geirmundur hafði engu gleymt og Sóley sá til þess að ég dansaði ekki ein.

Á maður ekki að skrifa eitthvað hérna?

2007-02-16T14:59:00.000Z

Þegar ég var lítil þótti mér afar rómantískt að halda dagbók. Ég reyndi oftar en einu sinni að halda slíkt rit en það fór ævinlega í vaskinn, trúlega sökum skipulagsleysis sem enn háir mér. Þetta hefur greinilega lítið breyst ef marka má iðni mína við þessa síðu.

Er stödd á Akureyri hjá elsku litla Drengnum hennar mömmu sinnar. Nú er klukkan 15:02 og ég hef ekki enn fengið kaffi. Fékk bara Pepsi Max morgunmat og hef reynt að dæla því í mig síðan til að ég fái nú örugglega minn koffeinskammt. Ég gæti náttúrulega rifið mig upp og rölt hér eina 100 metra í næstu kaffisjoppu, en nenni því ekki.

Á laugardag er stefnan tekin á þorrablót í Skagafirði. Ég verð í Lindabæjarliðinu. Sóley Sigmarsdóttir heimasæta á Lindabæ frá Sólheimum í Sæmundarhlíð í Skagafirði bauð mér á þorrablótið og réði mig jafnframt sem fulltrúa sinn í fjöldasöngnum. Mér skilst að ég komi til með að heyja harða baráttu við félaga í karlakórnum Heimi. Það verður létt verk og löðurmannlegt!

Á þorrablóti þessu verða hátt í þúsund manns. Já ég sagði þúsund (1.000,-). Ég geri því fastlega ráð fyrir að á konudaginn verði ég vakin upp á einhverju stórbýlinu með blómum og bónorði.

Tæknin er eitthvað að stríða okkur

2007-02-08T00:03:00.000Z

Var búin að skrifa þennan líka stórkostlega texta en allt hvarf!
Var einnig að reyna að setja myndir á myndasíðuna en það tókst ekki!
Hvað er í gangi?
Fór á Bifróvision á föstudaginn. Rosalega gaman! Þóra bauð okkur Emmellingum í kokteil fyrir Bifró og á hún heiður skilinn. Besta atriði sigraði og ég dansaði eins og John Travolta og daðraði við unga menn. Fór samt ein heim...... skrýtið!
Einhver baktería hefur verið sveimandi á Bifró því ég er búin að vera með einhvern flensuskít frá því á mánudag og fleiri í hópnum hafa orðið fyrir barðinu á flensunni.
Hef fylgst með Breiðuvíkurmálinu og er satt að segja búin að gera mér grein fyrir því hversu heppin ég er. Það er víst ekki sjálfgefið að eiga hamingjuríka æsku. Ég bara fæ ekki skilið hversu mannskepnan getur verið miskunnarlaus. Hvernig er hægt að koma svona fram við saklaus börn? Ég er fegin að skilja það ekki. Þetta herðir enn frekar á þeirri skoðun minni að við verðum að hugsa vel um börnin okkar, þ.e. við öll verðum að hugsa vel um þau börn sem ekki eru þeirrar gæfu aðnjótandi að njóta góðra foreldra. Það er undir okkur komið sem þjóð að reyna að skapa góða þjóðfélagsþegna framtíðarinnar.

Myndahlekkur

2007-02-01T14:50:00.000Z

Jæja þá er ég loksins búin að setja hlekk á myndirnar mínar hér til hliðar, vinstra megin.
Það eru nú engar nýjar myndir inni held ég, en það stendur ef til vill til bóta.
Ef til vill eru einhverjir ekki búnir að skoða gömlu myndirnar.

Lifið heil

Góður þáttur hjá Jóni

2007-01-27T20:03:00.000Z

Er að horfa á þátt með Jóni Ólafs. Hann kemur skemmtilega á óvart. Umfjöllunarefnið er (ef ég skil það rétt) grasrótartónlist. Gestur þáttarins er tónlistargagnrýnandi sem ég man ekki nafnið á.
Í þættinum koma fram ófrægar (að ég held) hljómsveitir skipaðar ungu fólki. Áðan komu fram 13 ára drengur og 14 ára stúlka. Þau voru alveg ótrúlega góð. Mun betri en margir þeir sem eldri eru.
Rétt í þessu var hljómsveitin Hjaltalín að spila og syngja alveg hreint gríðarlega skemmtilega og frumlega tónlist. Ef þetta er framtíðin þurfum við engu að kvíða.
Nú tala ég eins og ég sé einhver sérfræðingur í tónlist. Ég þykist ekki hafa hundsvit á tónlist en veit bara hvað mér finnst gott.

Gamla gufan

2007-01-25T09:30:00.000Z

Gamla gufan er orðin uppáhaldsútvarpsstöðin mín.
Er ég orðin gömul?
Hlusta reyndar mjög lítið á útvarp en kveikti á sjónvarpinu í morgun og þá var það að senda út gömlu gufuna. Laufskálinn er á dagskrá og verið að spjalla við einhverja konu um veraldarvefinn, afar athyglisvert.
Kosturinn við Gömlu gufuna er að hún er svo róleg. Það er ekki verið að reyna að láta mann hlusta á sem mest á sem skemmstum tíma. Þar er bara spjallað í rólegheitum án þess að láta einhverja áleitna tónlist yfirgnæfa spjallið.
Þetta er ekki smart. Ég geri mér grein fyrir því. Það er ekki í tísku að vera rólegur. Það á alltaf allt að vera á fullu. Alltaf eitthvað að vera að gerast.

Gróðurhúsaáhrif

2007-01-12T12:02:00.000Z

Ég hef verulegar áhyggjur af gróðurhúsaáhrifunum. Hlýnandi loftslag er víst eitt af einkennum þeirra:.

Myndavélar

2007-01-09T01:47:00.000Z

Það er rosaflott að eiga stafræna myndavél. Maður getur bara smellt af í gríð og erg án þess að hafa áhyggjur af framköllunarkostnaði. En þá tekur við annað vandamál! Maður þarf að taka myndirnar af myndavélinni og setja inn í tölvuna sína. Það tekur mun lengri tíma en að fara með filmu í framköllun. Þetta þýðir að ég er með fulla myndavél af myndum en má aldrei vera að því að setja þær yfir í tölvuna mína.
Af hverju gaf ég mér tíma til þess þegar ég var í Kína?
Kannski af því að þar var ekki hægt að horfa á sjónvarpið?

Lifið í lukku en ekki í krukku

Dóni

2007-01-04T14:20:00.000Z

Ég er voðalegur dóni. Sendi engin jólakort og hef ekki einu sinni vit á að óska fólki gleðilegra hátíða hér á þessum vettvangi. Úr því skal nú bætt enda jólin ekki búin enn.

Óska hér með öllum vinum og vandamönnum gleðilegra jóla og hamingju á nýju ári.
Ég vil byrja á að þakka Arnlaugi bróður mínum fyrir að sækja mig alla leið á Bifröst eftir erfiðan vinnudag svo ég kæmist í jólafríið.

Þá langar mig sérstaklega að þakka fjölskyldunni í Mosarimanum fyrir gestrisni og fyrirmyndarhátíðarhöld og Rocco fyrir að draga mig út í göngu (reyndar spurning hver dró hvern en hann var vissulega hvatinn að gönguferðunum).

Einnig langar mig að þakka öllum þeim sem ekki gefast upp á að senda mér jólakort ár eftir ár þrátt fyrir að ég noti námsannir til afsökunar á jólakortaleysi af minni hálfu.

Svo er það Soffía sem bauð mér í mat og notalegt jólakvöld og Harpa fyrir nýársnóttina.
Að lokum allir þeir sem áttu þátt í að jólin voru mér góð.

Núið

2006-12-20T07:32:00.000Z

Ég er skráð á svokallað "Nú"
Þetta þýðir að ég fæ tölvupóst einu sinni á sólarhring þar sem ég tek þátt í einhvers konar auglýsingakönnun. Ég er sem sagt að taka þátt í ódýrri auglýsingaherferð fyrir hin ýmsu fyrirtæki. Að launum get ég svo fengið verðlaun af ýmsum toga.
Ég hef fengið fullt af verðlaunum en þau eru aldrei án útgjalda.
Ég hef tvisvar fengið ókeypis mynd á myndbandaleigu í miðbænum. Hvað kostar að fara frá Bifröst og sækja diskinn og svo aftur til Reykjavíkur til að skila honum?
Fékk einu sinni ávísun á tveir fyrir einn á veitingahúsi í miðbænum. Fékk Gunnu systur með mér og ég fékk vondan mat á hálfvirði. Hefði samt ekki kostað mig neitt ef ég hefði bara látið Gunnu elda eitthvað voðalega gott heima hjá sér.
Um daginn fékk ég svo ávísun á 25% afslátt af mat á þessum sama veitingastað. Beðið er um að maður taki það fram áður en maður pantar að um slík verðlaun sé að ræða. Af hverju?
Fæ ég þá einhvern annan mat? Er það vegna þessa sem ég fékk miður góðan mat síðast? Þegar ég tók það fram, áður en ég pantaði, að ég væri með ávísun á ódýran mat?
Af hverju er ég að taka þátt í þessu?
Ég bara hef ekki hugmynd um það. Gæti verið vonin um að fá almennileg verðlaun. Gæti verið að ég sé fegin að fá truflun frá mínu daglega amstri. Gæti verið að mér finnist gaman að fá tölvupóst... sama hver sendir. Það er ekki gott að segja en samviskan segir mér að ég eigi alls ekki að taka þátt í svona rugli

Aðventan

2006-12-18T00:37:00.000Z

Slæmar fréttar af Byrginu
Góðar fréttir af Lóu
Slæmar fréttir af gangi prófalesturs
Góðar fréttir af veðrinu
Slæmar fréttir úr umferðinni
Góðar fréttir af jólunum (hef haft af því spurnir að þau séu á næstu grösum)

Jólafrí klukkan 16:15 á morgun !

Þegar allt bregst

2006-12-15T10:46:00.000Z

Þegar maður hefur ekki tíma til að blogga en þarf samt endilega að blogga þá kemur þetta:

1. Miðnafnið þitt:
2. Aldur:
3. Single or Taken:
4. Uppáhalds bíómynd:
5. Uppáhalds lag:
6. Uppáhaldshljómsveit:
7. Dirty or Clean:
8. Tattoo eða göt:
9. Þekkjumst við persónulega?
10. Hver er tilgangurinn með lífinu?
11. Myndiru bakka mig upp í slagsmálum?
12. Myndiru þaga yfir leyndarmáli ef það skipti mig máli?
13. Besta minningin þín um okkur?
14. Myndir þú gefa mér nýra?
15. Segðu eitthvað skrýtið um þig:
16. Myndir þú hugsa um mig ef ég væri veik/ur?
17. Getum við hist og bakað köku?
18. Hefuru heyrt kjaftasögu um mig nýlega?
19. Talaru eða hefuru talað illa um mig?
20. Finnst þér ég góð manneskja?
21. Myndir þú kerya með mér hringinn í kringum landið?
22. Finnst þér ég aðlaðandi?
23. Hverju myndiru vilja breyta í mínu fari?
24. Í hverju sefuru?
25. Kæmiru í heimsókn af tilefnislausu, bara til að chilla?
26. Myndir þú koma á stefnumót ef ég myndi bjóða þér?
27. Ef ég ætti einn dag ólifaðann, hvað myndum við gera?
28. Ætlaru að setja þetta á þína síðu svo ég geti fyllt þetta út?

Viðutan

2006-12-10T20:51:00.000Z

Það er margt að hugsa þessa dagana; ritgerðir og próf. Því var það svo að í dag var ég venju fremur viðutan. Ég var að koma hérna heim til mín í herbergi 407 í Hamragörðum og gekk niðurlút og hausinn á fullu að hugsa um vangaveltur OECD í skattamálum. Ég tók snögga beygju til vinstri og opnaði dyrnar að herberginu mínu, enn með augun á gólfinu. "Hva! ég var að skúra í gær" hugsaði ég er ég rak augun í blett á gólfinu. "Bíddu nú við! Hver hefur losað ruslið?" hugsaði ég er augun námu ruslapoka rétt til hliðar við blettinn. Á sekúndubroti runnu fjölda hugsana í gegnum hugann á meðan ég var að lyfta hausnum frá bringunni; "Eru komnir gestir?", er ég orðin rugluð?" Þegar hausinn á mér var kominn í þá stöðu að augu mín námu afganginn af herberginu stökk ég hæð mína. ÞAÐ SAT UNGUR MAÐUR Í STÓLNUM MÍNUM! Á sekúndubrotabroti rann sagan um Mjallhvíti og dvergana sjö í gegnum huga minn. "Úppss... ég er að villast. Fyrirgefðu" Í stólnum sat íbúinn í herbergi 405............. heima hjá sér !

Nýr og betri maður

2006-12-06T21:06:00.000Z

Mamma hringdi og spurði hvort ég væri enn í stresskasti. Ég sagði svo ekki vera. Það væri ekki sökum þess að það væri minna að gera, nema síður væri. Pressan orðin enn meiri en síðast þegar ég talaði við hana, en ég rólegri. Veit ekkert af hverju. Þá datt mömmu í hug vísa eftir Þórarinn Eldjárn:

Hér áður fyrr var angist mín svo sterk

ég endaði sem flak og taugabingur

af því ég kom aldrei neinu í verk

og ævi mín var stanslaus vítahringur

En allt er breytt, nú uni ég mér glaður

og ekkert hamlar lengur mínum frama.

Nú er ég orðinn nýr og betri maður,

nú kem ég engu í verk – og er skítsama.

Draumablogg

2006-12-02T11:09:00.000Z

Mig dreymdi í nótt að ég hefði sett hér inn einhverja gríðarlega góða færslu. Draumurinn var svo raunverulegur að mitt fyrsta verk í morgun var að kíkja á þetta fína blogg. Ekkert blogg, bara draumur!

Annars er ekkert að frétta.
Prófin nálgast ískyggilega hratt.
Er að reyna að vinna í ritgerð í alþjóðlegum skattarétti.
Ætla að reyna að skrifa um það hvernig OECD hefur leitast við að skýra hugtakið lágskattasvæði (Tax haven). Þetta þurfa að vera um 4.500 orð.
Held það sé nokkuð ljóst að ég verð aldrei fræðimaður á sviði lögfræði.

Snjóaði í nótt. Allt hvítt og afskaplega fallegt veður í Norðurárdal í dag.

Til hamingju Birgir!

2006-11-22T21:10:00.000Z

Í dag eignaðist hann Birgir vinur minn litla stúlku. Eða kannski ekki svo litla því hún var rúmlega 17 merkur.

Til hamingju Birgir!