Páskar

Þetta voru heldur viðburðarríkir páskar. Skipulagið var á þann veg að ég ætlaði að hafa það huggulegt á Akureyri, lesa námsefnið og slappa af. Sú varð ekki raunin.

Á fimmtudag, skírdag, var brunað austur á Vopnafjörð og þar tekin ein fermingarveisla. Berglaug Petra, hin bráðmyndarlega dóttir Þórdísar (föðursystir Drengs) og Garðars var fermd þennan dag. Þetta var svakalega fín veisla með dýrindis fæðu og drykk. Ég lenti reyndar í afar pínlegri reynslu þar sem gjöfin frá mér innihélt aðeins tóman skartgripakassa. Það voru auðvitað allir veislugestirnir sem fylgdust með þegar pakkarnir voru opnaðir og ekki mjög skemmtileg augnaráð sem mættu mér úr öllum áttum. Þetta er í síðasta sinn sem ég læt pakka inn gjöf í búðinni!
Nú er bara að sjá hvort verslunareigandinn standi sig áður en ég greini nánar frá málinu í smáatriðum.

Frá Vopnafirði lá leiðin norður á Þórshöfn þar sem beið mín uppbúið rúm og alkunn gestrisni á Hóteli Sollu. Drengirnir skoðuðu skemmtanalífið á Þórshöfn en ég var tiltölulega róleg enda kvefið ekki alveg að gefa sig. Það var gott að vera á Þórshöfn hjá Sollu, stjanað við mann í hvívetna og skemmtilegur félagsskapur. Hitti mann og annan, fékk gott kaffi hjá Birnu og afmælisveislu hjá Diddu, hvort tveggja í fylgd Heiðrúnar.

Drengirnir gerðu hlé á djamminu til að skreppa út á Langanes. Mér skilst að það hafi verið hin besta ferð í fylgd Reynis Atla og Ágústar Marinós.

Aftur var haldið í höfuðstað Norðurlands á laugardag. Fengum engin páskaegg þar sem akureyskir innkaupastjórar höfðu ekki gert sér grein fyrir því að bæjaryfirvöld voru búin að bjóða öllum landslýð á skíði, í leikhús og aðra menningu í þessum mikla páskaskíðamenningarbæ.

Á laugardagskvöld var okkur boðið í mat til þeirra heiðurshjóna Esterar og Árna. Þar var Drengur í hlutverki yfirkokks og eldaði þennan líka fína humar. Þetta var afar velheppnað kvöld, góður matur og skemmtilegt spjall.

Á páskadag voru piltar slappir einhverra hluta vegna en Drengur þó sínu verri en Stefán. Þeir voru þó farnir að hressast seinnipartinn enda eins gott því fyrir dyrum stóð eldamennska á ótal veisluréttum.

Við erum nefnilega öll ansi miklir matgæðingar og því var úr vöndu að ráða þegar velja átti páskamatinn. Það varð því úr að keypt var sýnishorn af nokkrum tegundum. Þeir elduðu svo drengirnir forrétt úr fasana, önd, hörpuskel og akurhænu. Þetta var með betri forréttum sem ég hef smakkað. Þegar búið var að borða forréttinn var hann látinn setjast í maganum í nokkra stund áður en hafist var handa við aðalréttinn. Þar var um að ræða kengúrukjöt með rótargrænmeti, villisveppasósu og kartöflum. Þetta var líka með betri mat sem ég hef fengið.
Í eftirrétt var svo súkkulaðikaka með ís og páskaeggi. Já.... við fengum sitt páskaeggið hvert.... af minnstu gerð.
Ég held að mér sé óhætt að segja að þessi páskadagur hafi verið með þeim betri sem gerast.